Emigrantët zënë një vend të rëndësishëm në sektorët ku Gjermania ka nevojë për punonjës, ndërsa dallimet në arsim dhe punësim mbeten të theksuara. Kjo është panorama që paraqet një raport mbi integrimin, për të cilin shkruan revista DER SPIEGEL. Raporti prej më shumë se 300 faqesh, i hartuar nga një ekip i Qendrës Gjermane për Hulumtimin e Integrimit dhe Migracionit në Berlin, shqyrton ecurinë e integrimit në disa fusha, nga tregu i punës dhe arsimi deri te kriminaliteti dhe dhuna e motivuar nga urrejtja.
Sipas DER SPIEGEL, duke iu referuar raportit, përqindja e gjermanëve pa histori emigracioni ka rënë nga pak më shumë se 81 për qind në vitin 2009 në rreth 68 për qind.
Rreth 70 për qind e personave të emigruar në Gjermani, të moshës 15-64 vjeç, janë të punësuar. Te gjermanët pa prejardhje migracioni, kjo përqindje arrin në 81 për qind.
Prania e emigrantëve është veçanërisht e lartë në sektorë që kanë nevojë urgjente për personel. Në gastronomi, gjysma e punonjësve të moshës 25-34 vjeç janë emigrantë. Në kujdesin për të moshuarit dhe në infermieri, pjesa e tyre arrin në 33 për qind për secilin sektor.
Këto të dhëna tregojnë peshën që emigracioni ka marrë në funksionimin e shërbimeve të rëndësishme për ekonominë dhe shoqërinë gjermane.
Sipas raportit të cituar nga DER SPIEGEL, dallimet shfaqen që në arsimin parashkollor. Ndër fëmijët e moshës tre deri në gjashtë vjeç që kanë emigruar në Gjermani, pak më pak se 70 për qind ndjekin kopshtin. Te fëmijët pa prejardhje migracioni, kjo shifër është mbi 91 për qind.
Hendeku vijon edhe në shkollë. Në testin PISA të vitit 2022, nxënësit pa rrënjë të huaja arritën mesatarisht 507 pikë në lexim, ndërsa nxënësit që kishin emigruar arritën 382 pikë.
Ndërkohë, 16,7 për qind e të rinjve pa shtetësi gjermane largohen nga shkolla pa dëftesë përfundimi, kundrejt 3,3 për qind të të rinjve me shtetësi gjermane. Raporti evidenton se mundësitë për një arsim të mirë mbeten të lidhura ngushtë edhe me mjedisin familjar.
Raporti trajton gjithashtu dallimet në statistikat penale. Personat pa pasaportë gjermane përbëjnë rreth 15 për qind të popullsisë, por përfaqësonin 40 për qind të personave të dënuar me vendim të formës së prerë për një vepër penale në vitin 2024.
Në të dhënat për të dyshuarit, raporti jep 4788 persona për çdo 100 mijë shtetas të huaj, kundrejt 1813 për çdo 100 mijë shtetas gjermanë. Këto shifra duhen dalluar nga të dhënat për të dënuarit: dyshimi për një vepër penale nuk përbën provë fajësie. Gjithashtu, shtetësia dhe prejardhja migratore janë kategori të ndryshme.
Një tjetër gjetje shqetësuese është rritja me 70 për qind që prej vitit 2021 e rasteve të dhunës dhe veprave të motivuara nga urrejtja, ku përfshihen sulme fizike, kërcënime dhe fyerje për shkak të origjinës, ngjyrës së lëkurës apo fesë. Sipas materialit të cituar nga DER SPIEGEL, në vitin 2025 numri i këtyre rasteve arriti nivelin më të lartë që nga fillimi i regjistrimit në vitin 2001. (A2 Televizion)
A2 CNN Livestream
MUND TE LEXONI GJITHASHTU
