“Të tronditur nga sulmi”, liderët botërorë dënojnë atentatin për vrasjen e Trump

Udhëheqësit botërorë dhe politikanët amerikanë reaguan në mbështetje të Donald Trump pas atentatit që iu bë në Pensilvani.

“Ky akt i tmerrshëm i dhunës politike në një tubim paqësor të fushatës nuk ka vend në Amerikë dhe duhet të dënohet unanimisht dhe me forcë”, tha kryetari republikan i Dhomës së Përfaqësuesve, Mike Johnson.

Udhëheqësi i shumicës demokrate në Senat, Chuck Schumer, bëri të ditur se ishte i tmerruar nga ajo që ndodhi dhe u lehtësua kur mori vesh se Trump ishte i sigurt.

Mesazhe kanë ardhur edhe nga liderët botërorë. Duke nisur nga Presidentja e Komisionit Europian, kryeministri izraelit, Presidenti ukrainas dhe shumë udhëheqës shtetesh në Europë, të gjithë dënuan fuqishëm atentatin.

Gjithashtu, shprehën lehtësimin e tyre kur mësuan që Donald Trump ishte mirë dhe nga kjo ngjarje doli me lëndime të lehta.

“Dhuna nuk ka vend në politikë”, ishte mesazhi kryesor i tyre, në reagimet që janë bërë në rrjetet sociale. (A2 Televizion)