Presidenti i Shteteve të Bashkuara, Donald Trump deklaroi se mendon që bisedimet për t'i dhënë fund luftës në Gaza kanë "shkuar shumë mirë", gjatë takimit që zhvilloi me kryeministrin izraelit Benjamin Netanyahu në Uashington DC.
Trump shprehu gjithashtu besim se Hamasi ishte i gatshëm t’i jepte fund konfliktit 21-mujor. “Ata duan të takohen dhe duan të kenë atë armëpushim”, tha ai në një deklaratë të papritur për gazetarët në Shtëpinë e Bardhë.
Takimi erdhi pasi raundet e fundit të bisedimeve indirekte për armëpushim midis Izraelit dhe Hamasit në Katar përfunduan pa ndonjë përparim, megjithëse negociatat pritej të vazhdonin këtë javë.
Në komentet e së hënës, Trump u pyet nga një gazetar se çfarë po e pengonte një marrëveshje paqeje në Gaza dhe ai tha: "Nuk mendoj se ka ndonjë pengesë. Mendoj se gjërat po shkojnë shumë mirë."
Të dy udhëheqësit u pyetën rreth planeve të mundshme për të zhvendosur palestinezët, me Trumpin që tha se ka bashkëpunim nga vendet fqinje me Izraelin.
Ndërkohë, Netanyahu tha se po punonte me SHBA-në për të gjetur vende që do t'u "japin palestinezëve një të ardhme më të mirë".
"Nëse njerëzit duan të qëndrojnë, mund të qëndrojnë, por nëse duan të largohen, duhet të jenë në gjendje të largohen", tha Netanyahu.
Presidenca palestineze më parë ka hedhur poshtë planet për zhvendosjen e palestinezëve, të cilat ajo theksoi se do të shkelnin të drejtën ndërkombëtare.
Në takim, kryeministri izraelit tha gjithashtu se e kishte nominuar Trumpin për Çmimin Nobel për Paqen, që thuhet se është një qëllim i kahershëm i presidentit të SHBA-së.
“Ai po krijon paqe ndërsa flasim, në një vend, në një rajon pas tjetrit”, tha Netanyahu ndërsa i dorëzoi Trump një letër që ia kishte dërguar komitetit të çmimit.
(A2 Televizion)
A2 CNN Livestream
MUND TE LEXONI GJITHASHTU
