Të paktën 120 persona, 100 prej të cilëve oficerë policie, mbetën të plagosur në përleshjet gjatë protestave antiqeveritare që shpërthyen në Mexico City.
Mijëra demonstrues marshuan në kryeqytetin meksikan të shtunën për të protestuar kundër krimit të dhunshëm dhe qeverisë së presidentes Claudia Sheinbaum.
Sheinbaum tha se marshimet, të cilat u zhvilluan edhe në qytete të tjera, ishin financuar nga politikanë të krahut të djathtë që kundërshtojnë qeverinë e saj.
Tubimi u organizua nga grupet rinore të Gjeneratës Z, duke marrë mbështetje nga qytetarët që protestonin kundër vrasjeve të profilit të lartë, përfshirë vrasjen vetëm disa javë më parë të kryetarit të bashkisë së Uruapan, Carlos Manzo, i cili kishte bërë thirrje për veprime të ashpra kundër karteleve.
Protestuesit valëvitnin banderola me mesazhe si "Ne të gjithë jemi Carlos Manzo", ndërsa të tjerë mbanin kapele kaubojsh në nder të tij.
Manzo u qëllua më 1 nëntor ndërsa po merrte pjesë në festivalin e Ditës së të Vdekurve.
Ai njihej për të folur hapur rreth bandave të trafikut të drogës në qytetin e tij dhe dhunës së karteleve. Ai kishte kërkuar veprime të ashpra kundër anëtarëve të armatosur të kartelit që terrorizojnë vendin.
Sheinbaum ka vepruar kundër karteleve, por i ka rezistuar thirrjeve për një luftë tjetër të përgjithshme kundër drogës. Përpjekjet e mëparshme nga paraardhësit e saj kanë përfunduar me rezultate të përgjakshme. (A2 Televizion)
A2 CNN Livestream
MUND TE LEXONI GJITHASHTU
