Zemërim në SHBA, prifti katolik pretendon se Jezusi ishte “hebre palestinez”

Reagime të forta në rrjetet sociale ka shkaktuar një prift, i cili u përpoq ta lidhë historinë e Krishtlindjeve me luftën në Izrael.

Në intervistën e publikuar në ditën e Krishtlindjes, prifti Edward Beck u pyet për dhimbjen dhe mjerimin në botë gjatë sezonit të festave dhe u ftua të jepte mesazhin e tij për ata që ndihen të pashpresë.

Përgjigja e tij ishte befasuese, pasi ai e cilësoi Jezu Krishtin si një "çifut - palestinez", i lindur në një vend të pushtuar.

“Ajo që më bën përshtypje është se historia e Krishtlindjeve ka të bëjë me një çifut palestinez – sa shpesh i hasni këto fjalë së bashku? Një çifut palestinez që ka lindur në një kohë kur vendi i tij ishte nën okupim, apo jo? Ata nuk mund të gjenin një vend që nëna e tij të lindte. Ata ishin të pastrehë. Përfundimisht atyre iu desh të iknin si refugjatë në Egjipt”, tha ai për CNN.

Pas kësaj deklarate, kritikat ndaj priftit ishin të forta. “Është një gabim i turpshëm”, komentoi një kolumnist i New York Post.

Megjithatë, Beck i qëndroi asaj që tha, duke ndarë në platformën X një artikull të Britannica të titulluar "Palestina çifute në kohën e Jezusit". Në të njëjtën kohë, ai iu përgjigj kritikëve të tij duke thënë se ata e morën mesazhin në kontekstin që dëshironin.

“Mesazhi im ishte ai i unitetit dhe solidaritetit, si për Izraelin ashtu edhe për palestinezët e vuajtur. Sa më shumë të theksojmë dallimet tona, aq më pak dashuri do të ketë në botë”, shkoi prifti.

E teksa përdoruesit e rrjeteve sociale vazhduan ta kritikonin, përfundimisht prifti filloi t'i bllokonte, gjë që po ashtu u komentua negativisht. (A2 Televizion)