Krah njëri-tjetrit qëndruan, por nuk shkëmbyen asnjë fjalë. Presidentja Vjosa Osmani, kryetari i ri i kuvendit, Dimal Basha, dhe kryeministri në detyrë, Albin Kurti, kryen homazhe në monumentin e Personave të Zhdukur në Kosovë, në ditën përkujtimore botërore për të zhdukurit me dhunë. Më pas zonja Osmani kërkoi me urgjencë të madhe që të përfundohet me konstituimin e kuvendit dhe formimin e qeverisë së re.
“Kuvendi të konstituohet urgjentisht, e qeveria po ashtu të formohet urgjentisht. Çdo ditë e humbur është ditë e humbur për Kosovën, për popullin e saj dhe për perspektivën tonë euroatlantike. Shpresoj që të gjendet një zgjidhje në përputhje me Kushtetutën sa më parë që të jetë e mundur”, tha Osmani, përcjell A2 CNN.
Aktualisht konstituimi i kuvendit po mbetet peng i zgjedhjes së nënkryetarit nga radhët e komunitetit serb. Të gjitha partitë shqiptare kundërshtojnë një emër nga Lista Serbe, ndërsa nuk është mbështetur as Nenad Rashiq, që nuk ka prirje aq radikale sa forca politike me 9 deputetë që kontrollohet nga Beogradi. Pas homazheve, kryeministri në detyrë i dha një përgjigje dhe presidentes.
“Dimal Basha është kryetar i Kuvendit i cili ende nuk është konstituar shpresoj këtë ta bëjmë nesër ka ngelur edhe një nënkryetar të zgjedhet besoj që më së miri do të ishte të kryhet kjo çështje nesër duke e përzgjedhur aty Nenad Rashiqin i cili e pranon Republikën e Kosovës, punon për institucionet dhe është ministri që ka bërë më së shumti për komunitetin serb në vendin tonë”, tha Kurti.
Kurti u pyet për dorëheqjen e ministrit të infrastrukturës, Liburn Aliu, pas pakënaqësisë publike për zgjedhjen e Dimal Bashës si kryeparlamentar. “E falendëroj ish ministrin, Liburn Aliu për kontributin e dhënë ne duhet të vazhdojmë përpara pa humbur kohë e kam emëruar në këtë detyrë zëvendësministrin, Hysen Durmishin… ne duhet të vazhdojnë përpara”.
Kurti më tej mbrojti kryetarin e ri të kuvendit pas kritikave të shumta lidhur me artikullin kundër UÇK-së. “Problemet që i kemi sot në Kosovë nuk i kemi nga një deformim apo keqinterpretim i një artikulli me bashkautorësi ku ky nuk është autor i atij kapitulli. Problemet i kemi kur është nënshkruar Zajednica në 2013, problemet i kemi kur janë amnistuar kriminelët në veri po ashtu në 2013, problemet i kemi kur është votuar Gjykata Speciale në 2015, problemet i kemi kur është themeluar Lista Serbe në bashkëpunim me Beogradin në vitin 2013, problemet i kemi kur politikanët e Kosovës kanë bërë qeveri duke u varur nga Lista Serbe e jo tek ky artikull ku manipulohet një kre tek i cili nuk ka fare autorësi”.
Kryetari i ri i kuvendit ka distancuar veten nga shkrimi në fjalë, pavarësisht se Dimal Basha rezultonte si bashkautor. (A2 Televizion)
A2 CNN Livestream
MUND TE LEXONI GJITHASHTU
