Vuçiç thotë se Kosova e pengon për në BE, Von der Leyen kërkon njohjen e Kosovës gjatë vizitës në Serbi

Fjalën e dhënë në Prishtinë, e mbajti në Beograd. Presidentja e Komisionit Europian, Ursula von der Leyen, i kërkoi liderit serb, Aleksandër Vuçiç, që Serbia të bëjë njohjen defakto të Kosovës.

Kjo ishte një ndër temat kryesore të diskutuara në Pallatin Presidencial në Beograd, ndërsa zyrtarja e lartë nga Brukseli bëri thirrje për zbatimin e plotë të marrëveshjes për normalizim me Kosovën.

Von der Leyen konfirmoi se pa përmbushur këto detyra të rëndësishme, nuk do të ketë as fonde dhe as përparim në rrugën drejt BE-së, as për Kosovën dhe as për Serbinë.

Bëhet fjalë për zbatimin e Marrëveshjes së Ohrit, e cila parashikon hapa të ndryshëm që përfshijnë njohjen e dokumenteve dhe institucioneve të Kosovës nga Serbia, dhe që shkon së bashku me themelimin e Asociacionit të Komunave me Shumicë Serbe që duhet të zbatohet nga Kosova.

Vuçiç konfirmoi se Kosova dhe sanksionimi i Rusisë po pengojnë rrugën e Serbisë për në Bashkimin Europian.

Ai u shfaq kontradiktor, pasi konfirmoi se do të zbatojë gjithçka që ka pranuar në kuadër të dialogut, por refuzoi të bënte njohjen e Kosovës.

Për ne njohja e pavarësisë së Kosovës nuk është e mundur dhe këtë e kam thënë pafundësisht. Këtë e kam thënë pafundësisht dhe nuk është e vështirë për mua dhe nuk më vjen turp, jam krenar që e them para presidentes së KE-së. Për Serbinë është e qartë se nuk mund të bëjë diçka që bie në kundërshtim me kushtetutën. Ne i dimë se cilat janë obligimet tona nga dialogu dhe jemi të gatshëm t'i përmbushim.

Presidentja e Komisionit Europian kërkoi nga Vuçiç që ta pranojë propozimin europian për draft-statutin e asociacionit. Presidenti serb nënvizoi se propozimi është bazë e mirë për bisedime, teksa lëshoi akuzat e zakonshme se Kosova nuk do ta formojë atë.

Von der Leyen dënoi ashpër edhe në Beograd, sulmin e dhunshëm të ndodhur në Banjskë të Kosovës dhe kërkoi që autorët të dalin para drejtësisë.

Presidentja e Komisionit Europian vizitoi Serbinë, si pjesë e turit të saj në Ballkanin Perëndimor, ku prezantoi planin e rritjes ekonomike. Porositë e tjera për Beogradin ishin që të bëjë më shumë për lirinë e mediave dhe pavarësinë e gjyqësorit. (A2 Televizion)