Raketat ruse godasin rrugët e Kievit, një i vrarë dhe 6 të plagosur

Një person është vrarë dhe gjashtë të tjerë janë plagosur pasi një raketë ruse goditi një rrugë banimi në Kiev. Lajmi është konfirmuar nga autoritetet ukrainase, cituar nga BBC.

Mbetjet e raketës shkatërruan një autobus, ndërsa një ndërtesë banimi mori flakë në lagjen Kurenivka të kryeqytetit. Shërbimi Shtetëror i Emergjencave të Ukrainës shton se në të nuk kishte asnjë pasagjer ndërsa autobusi u shkatërrua plotësisht.

Fotot e shpërndara nga Anton Gerashchenko, këshilltar i Ministrisë së Brendshme të Ukrainës, tregojnë mbetjet e autobusit të shpërndara nëpër rrugë, ndërsa tymi ngrihet nga ndërtesa e dëmtuar. Kurse gjurmët e raketave kundërajrore shihen lart në qiell, pasi u kapën nga mbrojtja ajrore e Ukrainës. (A2 Televizion)