Korça ndezi mbrëmjen e djeshme dritat dekorative të festave të fundvitit, në një ceremoni të ndjekur nga qindra banorë dhe turistë që kishin mbushur qendrën e qytetit. Ndërsa numërimi mbrapsht nisi, atmosfera u ndez nga efekti i dritave që shpërthyen mbi pedonale, duke e kthyer qytetin në një skenë tipike të magjisë së Dhjetorit.
Turistët, shumica nga qytete të ndryshme të Shqipërisë, por edhe të huaj, e kanë kthyer Korçën në një destinacion të përvitshëm. Ata tregojnë se rikthehen çdo fundvit për atmosferën e veçantë, traditat dhe qetësinë që ofron qyteti.
"Nuk është hera ime e parë. Ky është viti im i tretë që vij në Korçë. Jam nga Greqia, Xanthi. Këtu çdo gjë është bukur, paqësore. Vij me familjen time. Festat në Dhjetor janë magjike në Korçë".
"Gëzuar Krishtlindjen dhe Vitin e Ri nga një mik grek i Korçës për gjithë shqiptarët".
"Unë vij nga Selaniku, vij përherë në Korçë. Ka një atmosferë fantastike në këtë qytet dhe ne jemi dashuruar", shprehen turistët grekë.
Ndërkohë, Kryetari i Bashkisë, Sotiraq Filo, theksoi se Korça është shndërruar tashmë në kryeqytetin e festimeve, me një kalendar të pasur eventesh që do të zgjasë deri më 6 Janar. Ai shtoi se kapacitetet akomoduese janë të gjitha të rezervuara prej kohësh, duke treguar fluksin e lartë të vizitorëve.
"Korça ndezi dritat e festave dhe merr pamje magjike duke u shndërruar në kryeqytetin e festimeve. Është një kalendar i pasur që do na shoqërojë gjatë gjithë ditëve deri në Janar. Do kemi shumë miq e vizitorë, brenda e jashtë Shqipërisë. Ka kohë që gjithë kapacitetet akomoduese të Korçës janë të rezervuara", theksoi kryebashkiaku Sotiraq Filo.
Gjatë gjithë Dhjetorit, Bashkia e Korçës ka planifikuar një program të ngjeshur artistik me shfaqje, koncerte dhe aktivitete kulturore, duke e kthyer qytetin në një prej destinacioneve më të kërkuara festive në vend. (A2 Televizion)
A2 CNN Livestream
MUND TE LEXONI GJITHASHTU
