Kryebashkiakëve nuk iu mjaftojnë 72 miliardë lekë. Ankesat i kanë bërë në komisionin për Çështjet Ligjore, ku thanë se fondet janë të pamjaftueshme për të përmbushur funksionet e deleguara dhe për të ofruar shërbimet e duhura.
“Do të propozoja edhe për shtimin e fondeve për zonat rurale për mirëmbajtjen e rrugëve.”
ERISELDA SEFA - KRYETARE E BASHKISË LUSHNJE
“Besoj të gjithë jemi dakord se 1% e GDP për pushtetin vendor është pak dhe e pamjaftueshme duke e krahasuar me të gjithë vendet e rajonit. Është kërkesë e jona për rritjen e granteve dhe sidomos për funksionet e deleguara. Flasim për një sërë funksionesh edhe për shkak të decentralizimit. Kur shohim të dhënat e financuara që ne mbulojmë për të gjitha funksionet e deleguara janë të shumta."
GLEDIAN LLATJA - KRYETAR I BASHKISË ELBASAN
“Përsa u përket pyjeve, zjarrfikëseve të jetë një vëmendje më e shtuar për këto sektore.”
ANDI SEFERI – ZV/KRYETAR I BASHKISË TIRANË
“Mendohet se nuk është i mjaftueshëm ky buxhet për realizimin e nevojave dhe shërbimeve me standardet e kërkuara.”
ADELINA FARRICI - SHOQATA PËR AUTONOMI VENDORE
Por ministri i Shtetit për Pushtetin Vendor, Arbjan Mazniku vuri në dukje rritjen e transfertës nga qeveria drejt bashkive me 14-20%.
“Buxheti vendor është rritur me 10.4% krahasuar me 2023. Transferta për bashkitë është 35 miliardë nga 30 miliardë në 2023 dhe një rritje me 16.7% krahasuar me një vit më parë. Bashkitë kanë pasur rritje të transfertës midis 14-20% duke ju përmbajtur formulës.”
ARBJAN MAZNIKU - MINISTËR I SHTETIT PËR PUSHTETIN VENDOR
Në buxhetin total transferta për 61 bashkitë në vend për vitin e ardhshëm do të jetë 35 miliardë lekë, duke njohur një rritje prej rreth 5 miliardë lekë në raport më 2023. (A2 Televizion)
A2 CNN Livestream
MUND TE LEXONI GJITHASHTU
