Nga avionët në Rinas apo tragetet në Durrës e Vlorë nuk po zbresin vetë turistë që duan të shijojnë plazhet apo natyrën e Shqipërisë... një pjesë e tyre vijojnë të bëjnë një rrugë dhe dy punë: Pushime dhe rregullim dhëmbësh.
“2025 mund të them që ishte vit me goxha pacientë të huaj. Çdo vit ka pasur pacientë që vijë nga jashtë për të përfituar nga shërbimet tona mjekësore, kryesisht dentare në këtë rast. Mund të them se çdo herë dhe më shumë është në rritje falë standardeve në klinikat tona dhe laboratorët dentarë”, tregon për A2 CNN Aida Sadiku, mjeke stomatologe.
Veç Italianëve... mjekja stomatologe Aida Sadiku na tregon edhe për origjinat e pacientëve të tjerë dhe llojet e shërbimeve që kërkojnë të marrin. “Qytetarët që vijnë nga Italia , por edhe vendet e tjera nuk mbeten pas. Edhe nga Anglia ose nga Franca... edhe Gjermania... ka pacientë të rinj të cilët po vijnë në vendin tonë për të përfituar kryesisht nga shërbimet tona në drejtim të estetikës. Dentistrika estetike është trendi global për të gjithë pacientët, veçanërisht në këtë periudhë vere”, thotë ajo.
Vetëm në harkun e muajve janar-korrik, të dhënat tregojnë se të ardhurat e klinikave dentare shkuan në linjë me zgjerimin e turizmit, duke kapur shifrën e mbi 7 miliardë lekëve. Kjo pavarësisht rritjes së çmimeve. “Mund të themi se çmimet kanë pësuar një rritje graduale. Dhe këtu nuk flasim vetëm për çmimet shëndetësore, por edhe në përgjithësi. Zhvlerësimi i euros është ndier dhe ndaj kjo është kompensuar duke rritur disi çmimet”, thotë ajo.
Në gjithë vendin janë rreth 3 mijë e 800 stomatologë të licencuar, në të cilat punojnë në rreth 1 mijë e 500 klinika dentare. Të dhënat tregojnë se kanë qenë së paku 10 mijë të huaj që kanë hyrë në Shqipëri për trajtime stomatologjike në 7 vitet e fundit. (A2 Televizion)
A2 CNN Livestream
MUND TE LEXONI GJITHASHTU
