Buxheti 2025 është gati të nisë diskutimet në komisionet parlamentare. Qeveria ka shpallur në këtë draft drejtimet kryesore se ku do të përdoren paratë e taksapaguesve, duke përcaktuar kështu edhe prioritetet e zhvillimit të ekonomisë.
Në buxhetin 2025, shpenzimet kryesore do të shkojnë për financimin e skemës së sigurimeve shoqërore, duke përfshirë këtu edhe indeksimin e pensioneve. Zëri i dytë më i madh në shpenzimet e buxhetit janë kostot e personelit, së bashku me ato operative për funksionimin e administratës, pasuar nga investimet publike, që vitin e ardhshëm do të shënojnë nivelin rekord të 6.1% të Prodhimit të Brendshëm Bruto, duke përkuar edhe me vitin zgjedhor.
Një rritje e ndjeshme e shpenzimeve në buxhetin 2025 është parashikuar edhe për pushtetin vendor.
Për bashkitë do të jepen në total 89.9 miliardë lekë, me rritje mbi 10 miliardë kundrejt vitit 2024. Këtu përfshihen edhe fondet që do të duhen për rritjen e pagave të administratës vendore, që qeveria ka premtuar ta realizojë vitin e ardhshëm.
Por cilët janë sektorët e konsideruar prioritarë në buxhetin 2025?
Shpenzimet më të madhe buxhetore shkojnë për Ministrinë e Shëndetësisë dhe Mbrojtjes Sociale, duke përfshirë këtu edhe ndihmën që jepet për kategori të caktuara, si pensionistët, familjet me ndihmë ekonomike, të papunët etj. Në vend të dytë renditet Ministria e Infrastrukturës dhe Energjisë, për shkak të rritjes së fondeve për investimet në infrastrukturë, ndërkohë që pason ministria e Arsimit, Rinisë dhe Sporteve. Më pak fonde do të jepen për Ministrinë e Bujqësisë, sektor që edhe në buxhetin e vitit të ardhshëm nuk do të ketë vëmendje të madhe buxhetore.
Buxheti 2025 u prezantua pak orë më parë në Konferencën e Kryetarëve në Kuvendin e Shqipërisë, duke i hapur kështu rrugë diskutimit të tij në komisionet parlamentare. (A2 Televizion)
A2 CNN Livestream
MUND TE LEXONI GJITHASHTU
