“Libri i Bardhë 2025-2029”, i shoqatës së Investitorëve të Huaj, vjen ngjyrë “gri” dhe me nota të shumta kritike për ekonominë shqiptare. Vlerësimi për klimën e të bërit biznes në vend u përkeqësua me 4 pikë krahasuar me vitin 2024, duke rënë në vetëm 45 nga 100 pikë të mundshme.
“Nga perspektiva makroekonomike, bizneset theksuan se zhvlerësimi i euros dhe inflacioni i lartë janë faktorët më të rëndësishëm që ndikojnë në operacionet e tyre. Tensionet gjeopolitike globale dhe rreziqet në zinxhirin e furnizimit vazhdojnë të ndikojnë në planifikimin e biznesit dhe vendimet për investime. Në këtë kontekst, investitorët e huaj theksojnë nevojën për parashikueshmëri më të madhe ekonomike, komunikim më të qartë dhe politika më të qëndrueshme nga autoritetet publike”, deklaron FIAA.
Investitorët e huaj u shprehën optimistë ndërkohë për situatën ekonomike duke e vlerësuar atë me 56 pikë nga 100 të mundshme. Në raport me vitin 2024, treguesi u përmirësua me 7 pikë. Megjithatë sfidat që lidhen me mirëqeverisjen vijojnë të mbeten problematike.
“Sfidat e lidhura me qeverisjen vazhdojnë të jenë ndër shqetësimet më të rëndësishme për investitorët e huaj. Korrupsioni mbetet një pengesë kryesore. Megjithëse niveli i informalitetit që përjetojnë bizneset ka rënë me 5 pikë, ai mbetet i lartë. Sfida të vazhdueshme të lidhura me regjistrimin e pronës, vonesat gjyqësore dhe mungesën e llogaridhënies institucionale vazhdojnë të ndikojnë në besimin e investitorëve. Klima politike perceptohet pak më e përmirësuar. Në aspektin pozitiv, dimensioni i rendit dhe sigurisë ka shënuar përmirësimin më të madh”, thotë FIAA.
Megjithatë përfaqësuesit e kompanive të huaja u shprehën shumë të shqetësuar në drejtim të gjetjes së fuqisë punëtore të kualifikuar.
“Tregu i punës mbetet ndër zonat me performancën më të dobët sipas investitorëve të huaj. Aksesimi i fuqisë punëtore lokale të kualifikuar gjithashtu ka rënë pak. Mungesa e thellë e punonjësve të kualifikuar, e shkaktuar kryesisht nga emigracioni dhe mos-përputhja e aftësive, vazhdon të ushtrojë presion mbi bizneset dhe kufizon potencialin e rritjes. Këto gjetje theksojnë rëndësinë e forcimit të arsimit profesional, përshtatjes së zhvillimit të aftësive me nevojat e tregut të punës dhe implementimit të strategjive efektive për mbajtjen e talentit”, deklaron FIAA.
Pavarësisht përmirësimit të disa treguesve, sipas Shoqatës së Investitorëve të Huaj klima e të bërit biznes vijon të jetë problematike për shkak të sistemit gjyqësor, mungesës së transparencës nga qeveria, pamundësia për forcë punëtore, legjislacioni fiskal dhe administrata tatimore.
(A2 Televizion)
A2 CNN Livestream
MUND TE LEXONI GJITHASHTU
