Inspektori i Lartë i Drejtësisë ka regjistruar një hetim disiplinor ndaj gjyqtares së Gjykatës së Posaçme, Irena Gjoka, në lidhje me dënimin ndaj saj nga drejtësia greke, të padeklaruar në formularin e dekriminalizimit.
Sipas ILD, ekzistojnë dyshime të arsyeshme që magjistratja Irena Gjoka ka kryer veprime ose mosveprime që përbëjnë shkelje disiplinore.
A2 mëson se hetimi i ILD ka nisur me iniciativë dhe me nismë nga ankuesit Gazment Bardhi dhe Adriana Kalaja. Për llogari të këtij hetimi, ILD do të administrojë dosjen e plotë të Prokurorisë së Përgjithshme, informacione nga KLGJ mbi formularin e dekriminalizimit, si edhe informacion nga SPAK në lidhje me një procedim të nisur pas një kallëzimi në emër të Gjokës.
Në janar, Prokuroria e Përgjithshme i bëri me dije shkresërisht Këshillit të Lartë Gjyqësor se Irena Gjoka rezultonte të ishte e dënuar nga Gjykata e Janinës, Greqi, në vitin 2005 me 3 muaj burg dhe 1500 euro gjobë; se ky dënim ishte konvertuar në gjobë me 4.4 euro dita; se vendimi ishte arkivuar dhe nuk ishte ekzekutuar.
Në mbledhjen e 30 janarit, me shumicë votash, KLGJ vendosi të mos niste verifikim të statusit të gjyqtares Gjoka, me arsyetimin se ky veprim duhet të kryhet nga Inspektori i Lartë i Drejtësisë.
Pak ditë pas mbledhjes, vetë Gjoka ka pretenduar se nuk ishte njoftuar kurrë, në asnjë formë, se ishte dënuar nga një gjykatë greke. (A2 Televizion)
A2 CNN Livestream
MUND TE LEXONI GJITHASHTU
