Pas ngjarjes së rëndë të ndodhur sot në qendër të Shkodrës, ku dy persona humbën jetën dhe një vajzë mbeti e plagosur, ka reaguar për mediat dhe opinionin publik Erogen Millan Vaso (Brajoviç), i cili mbeti gjithashtu i plagosur dhe sipas deklarimeve të autorit të dyshuar të ngjarjes, ishte edhe objektiv i atentatit.
Ai ka shprehur ngushëllimet për viktimat dhe familjet e tyre, duke e cilësuar ngjarjen një dhimbje të madhe personale dhe plagë që nuk mbyllet, shkruan A2 CNN. Vaso ka sqaruar gjithashtu se distancohet nga çdo aludim që e lidh atë me grupe apo emra të caktuar në Shkodër, duke theksuar se është sipërmarrës dhe me të kaluar në sport e në jetën publike të qytetit.
Deklarata e plotë
Unë, Erogen Millan Vaso (Brajoviç), bëj këtë reagim për mediat dhe opinionin publik.
Në këto momente të vështira, jo vetëm për mua, i shpreh ngushëllimet e ndjera familjarëve të dy miqve të mi, me të cilët ishim së bashku sot në mëngjes, në një kafe në qendër të Shkodrës. Ata ishin qytetarë model të Shkodrës, familjarë të respektuar nga gjithë komuniteti. Dora e pabesës së një vrasësi i shkëputi sot nga jeta, teksa ishim së bashku, dhe për mua personalisht kjo është një dhimbje e rëndë dhe plagë që nuk mbyllet kurrë!
Qofshin në paqe me Zotin Armando dhe Geridoni! Zoti u dhëntë forcë familjeve të tyre! Gjithashtu, i uroj shërim të shpejtë vajzës së plagosur në këtë ngjarje.
Më duhet të distancohem plotësisht nga informacionet që lidhin personin tim me emra dhe grupe të caktuara në Shkodër.
Jam sipërmarrës në disa biznese, një pjesë të të cilave i kam trashëguar nga babai im, gjithashtu sipërmarrës deri në fund të jetës, ish-futbollist i Shkodrës dhe i Kombëtares Shqiptare.
Unë kam qenë, për shkak edhe të traditës familjare, ish-futbollist i ekipit të Vllaznisë dhe ish-president i klubit të futbollit Tërbuni i Pukës. Familja ime ka pasur një histori përndjekjeje politike para viteve ’90, por edhe vite më pas, për shkak se ka përfaqësuar komunitetin malazez në qarkun e Shkodrës. Për interesat e këtij komuniteti dhe të Shkodrës kam shërbyer me korrektësi për disa vite si anëtar i Këshillit Bashkiak të qytetit tim, ashtu sikurse kishte shërbyer edhe njëri prej miqve të mi të afërt që humbi jetën sot.
Jam informuar në spital se autori është ndaluar dhe shpresoj që të zbardhen sa më shpejt motivet e këtij akti të rëndë tragjik! Sa për lidhjet e tjera që aludohen në media, sqaroj se duhet lënë në dorë të institucioneve të ligjit trajtimi i këtyre çështjeve.
Çfarë ndodhi në Shkodër?
Pa kaluar as tri ditë nga atentati pranë Kinema Republika, mëngjesin e të hënës një atentat i dyfishtë ka ndodhur pak metra larg bashkisë së qytetit në një lokal aty pranë, raporton A2 CNN. Një person ka hapur zjarr me armë automatike duke lënë të vdekur dy persona dhe duke plagosur dy të tjerë.
Viktima të kësaj ngjarje kanë mbetur Armando Pali, punonjës i IMT në Bashkinë e Shkodrës dhe Liridon Kraja, i cili ka ndërruar jetë në spital. Nga të shtënat ka mbetur i plagosur edhe shtetasi tjetër Erogen Vaso, që ishte në tavolinë me viktimat si dhe kamerierja e lokalit, Meri Kaceri, 25 vjeç, e cila është plagosur rastësisht.
Pak minuta pas kësaj ngjarje të rëndë policia në ndjekje e sipër ka ndaluar në periferi të Shkodrës autorin e dyshuar të kësaj vrasje të dyfishtë, Ragip Gila, i cili së bashku me mjetin e tij tentoi t’i shpëtonte ndjekjes së policisë.
Për momentin mbeten ende të paqarta rrethanat e kësaj ngjarje që përveç viktimave ka rrezikuar jetën edhe të shumë personave të tjerë që ndodheshin në lokal. Gjithashtu ende nuk dihet se kush nga tre personat qe ishin bashke mund të ketë qenë shënjestra e vërtetë e këtij atentati. Por dihet që autori i dyshuar ka pasur precedent të mëparshëm penalë. Arrestimi i autorit të dyshuar të kësaj masakre, dhe dëshmia e njërit prej të plagosurve i cili gjithashtu është i njohur nga policia, pritet të zbardhë edhe motivet e kësaj ngjarje që është në kufijtë e një akti terrorist në ambiente publike. (A2 Televizion)
A2 CNN Livestream
MUND TE LEXONI GJITHASHTU
