Gjykata Kushtetuese ka vendosur të lerë të pandryshuar dënimin me burgim të përjetshëm ndaj Fatjon Karmeshtnës, i fajësuar për vrasjen e një gruaje në Melgushë të Shkodrës, prillin e vitit 2016.
Karmeshtna është shpallur fajtor në tre shkallët e gjykimit për vrasjen e Suela Sulës, bashkëshortes së Sadetin Sulës, pronarit të moblierisë ku ishte i punësuar, me urdhër të këtij të fundit.
Në Kushtetuese 42 vjeçare Karmeshtna kërkoi shfuqizimin e tre vendimeve gjyqësore, duke pretenduar se gjykatat e faktit nuk kanë kryer një hetim të plotë e të gjithanshëm, se nuk kanë marrë në konsideratë prova të kërkuara prej tij dhe se kanë krijuar bindjen në prova imagjinare e jo të marra sipas ligjit.
Në shqyrtimin paraprak të ankimit, një Kolegj 3 anëtarësh i Kushtetueses vlerësoi se pretendimet e Karmeshtnës për cenim të të drejtave kushtetuese ishin haptazi të pabazuara dhe vendosi të mos e kalojë çështjen në gjykim, duke lënë kështu në fuqi dënimin me burg përjetë ndaj tij.
Fatjon Karmeshtna u arrestua në vitin 2018, gati dy vjet pasi Suela Sula u gjend e pajetë në tualetin e mobilierisë në pronësi të bashkëshortit të saj Sadetin Sula. Fillimisht për krimin u dyshua vetëm biznesmeni Sula, por më pas rezultoi se ai ishte organizator.
Mbytja e gruas me duar e mjete të tjera ishte bërë me urdhër të tij nga punonjësi i mobilierisë. Në gjykim u provua se materiali gjenetik i gjetur në thonjtë e viktimës, përputhej me ADN-në e Karmeshtnës.
Sipas gjykatës, krimi kishte ardhur pas një marrëdhënieje të acaruar në çift për motive xhelozie nga ana e Sadetin Sulës, i cili planifikoi vrasjen e të shoqes, që ajo të mos përfitonte pasuri në rast divorci. Për të njëjtin krim, Sadetin Sula, po vuan një dënim me burgim të përjetshëm. (A2 Televizion)
A2 CNN Livestream
MUND TE LEXONI GJITHASHTU
