Policia ka publikuar detaje nga ngjarja e ndodhur në orët e para të ditës së sotme në një lokal në Tiranë, ku mbetën të plagosur me armë zjarri 3 persona, dyshohet në mënyrë aksidentale.
Sipas policisë, autori i dyshuar i kësaj ngjarjeje është shtetasi me iniciale E. E., 32 vjeç, i cili është shpallur në kërkim pasi akuzohet për veprën penale "Plagosja e rëndë me dashje”.
Ndërkohë, u vunë në pranga dy persona të tjerë shtetasit A. D., 38 vjeç, dhe D. Z., 35 vjeç, të cilët akuzohen për veprën penale "Veprime që pengojnë zbulimin e së vërtetës", kryer në bashkëpunim.
“Në vijim të veprimeve të shpejta hetimore, nga Sektori për Hetimin e Krimeve të Rënda në DVP Tiranë, është bërë i mundur dokumentimi i plotë i autorësisë së ngjarjes, dhe si rezultat:
- u shpall në kërkim shtetasi E. E., 32 vjeç, për veprën penale "Plagosja e rëndë me dashje", parashikuar nga neni 88/2 i Kodit Penal;
- u arrestuan shtetasit A. D., 38 vjeç, dhe D. Z., 35 vjeç, të dy banues në Tiranë, për veprën penale "Veprime që pengojnë zbulimin e së vërtetës", kryer në bashkëpunim, parashikuar nga neni 301/25 i Kodit Penal.
Gjithashtu, gjatë kryerjes së veprimeve procedurale, si dhe këqyrjes së kamerave të sigurisë, është bërë e mundur gjetja e armës së zjarrit pistoletë TT, e cila dyshohet se është përdorur gjatë ngjarjes.
Pas kryerjes së krimit nga shtetasi E. E., dy të arrestuarit, i kanë marrë armën e zjarrit dhe më pas e kanë fshehur atë, me qëllim pengimin e zbulimit të veprës penale dhe të autorit të saj”, njofton policia. (A2 Televizion)
A2 CNN Livestream
MUND TE LEXONI GJITHASHTU
