Transportuan armë zjarri nga Kosova, me qëllim shitjen në Tiranë, arrestohen dy të rinj kosovarë

Dy kosovarë janë vënë në pranga nga Policia e Tiranës, pasi kishin transportuar një armë zjarri pistoletë, nga Kosova drejt Shqipërisë, me qëllim shitjen e saj.

Gjatë kontrollit në automjetin e dy të rinjve shërbimet e Policisë gjetën të fshehur një armë zjarri pistoletë, me krëhër e municion luftarak, dhe një silenciator, që i kishin sjellë në Shqipëri për t’i shitur tek persona të tjerë.

Policia po punon për identifikimin e personave të tjerë të përfshirë në këtë veprimtari kriminale.

Njoftimi i Policisë Tiranë

Në zbatim të masave të planit operacional mbarëkombëtar "Sundimi i ligjit", finalizohet nga Komisariati i Policisë Nr. 3, operacioni policor i koduar "Transportuesi 4".

Transportuan një armë zjarri, nga Kosova, me qëllim shitjen e saj te persona të tjerë në Tiranë, vihen në pranga 2 shtetas.

Sekuestrohen një armë zjarri pistoletë, krëhëri me municionin luftarak, një silenciator, një automjet dhe një aparat celular.

Shërbimet e Komisariatit të Policisë Nr. 3, në vijim të zbatimit të masave të planit operacional "Sundimi i ligjit", pas informacioneve të siguruara nga inteligjenca policore, për dy shtetas që dyshohej se kishin transportuar një armë zjarri pistoletë, nga Kosova drejt Shqipërisë, me qëllim shitjen e saj, kanë organizuar dhe finalizuar operacionin policor të koduar "Transportuesi 4".

Si rezultat i tij, në rrugën "Dritan Hoxha", u kapën dhe arrestuan në flagrancë shtetasit:

- R. F., 19 vjeç, banues në Vushtri, Kosovë, dhe A. A., 19 vjeç, banues në Mitrovicë, Kosovë.

Gjatë kontrollit të automjetit me të cilin qarkullonin këta shtetas, shërbimet e Policisë gjetën të fshehur një armë zjarri pistoletë, me krëhër e municion luftarak, dhe një silenciator, që ishin sjellë në Shqipëri për tu shitur tek persona të tjerë.

Arma e zjarrit, krëhri, municioni luftarak, silenciatori, automjeti dhe një aparat celular, u sekuestruan në cilësinë e provës materiale.

Punohet për identifikimin e personave të tjerë të përfshirë në këtë veprimtari kriminale.

Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale. (A2 Televizion)