Kryetari i PD-së, Sali Berisha, në një konferencë me gazetarët, reagoi ndaj deklaratës së Marta Kos lidhur me zgjedhjet në Shqipëri, duke e cilësuar atë “të frymëzuar nga propaganda e paguar e Edi Ramës”. Sipas tij, deklarata e diplomates përbën një shkelje të rëndë të standardeve ndërkombëtare të vlerësimit të zgjedhjeve.
Berisha theksoi se Partia Demokratike ka kundërshtuar publikisht qëndrimin e Kos, të cilin e ka quajtur produkt të “ekstremizmit të majtë, dizinformimit dhe admirimit të pashpjegueshëm ndaj Ramës dhe qeverisë së tij”.
Në vijim, ai njoftoi se ka përshëndetur reagimin e zëdhënësit të Komisionit Europian, i cili, sipas Berishës, ka dhënë një qëndrim “kryekëput të kundërt” me atë të Marta Kos, duke reflektuar qëndrimin zyrtar të BE-së, shkruan A2 CNN.
“Falënderoj Komisionin Europian për reagimin korrekt,” u shpreh Berisha, duke shtuar se PD mbetet e angazhuar plotësisht në procesin e integrimit europian, të cilin e cilësoi “të ardhmen më të mirë për shqiptarët”.
Ai deklaroi se Shqipëria aktualisht “nuk plotëson asnjë nga kushtet për anëtarësim”, përveç pozicionit gjeostrategjik. (A2 Televizion)
A2 CNN Livestream
MUND TE LEXONI GJITHASHTU
