Deputetja Romina Kuko ka deklaruar se problemi kryesor në Kuvendi i Shqipërisë nuk është mungesa e fjalës, por mungesa e dëgjimit mes palëve politike. Në Off the Record me Andrea Dangllin në A2 CNN, ajo Kuko tha se koha e të folurit në parlament e Partisë Demokratike është dyfish më e madhe se ajo e Partisë Socialiste, duke hedhur poshtë pretendimet se opozita nuk lejohet të shprehet.
“Koha e të folurit në parlament të Partisë Demokratike është dyfishi i PS-së. Shkoni, kontrollojeni, shikoni kohën që merret nga pala tjetër dhe patjetër që po, se mua personalisht mua më pëlqen edhe debati dhe kritika dhe përplasja dhe mirë që të kemi sa më shumë zë kur vjen puna nga opozita, por është dyfishi dhe çfarë dëgjojmë zakonisht nuk na lënë të flasim, nuk na lënë të diskutojmë, nuk na lënë të debatojmë e të tjera, e të tjera. E dëgjoj shpesh që thuhet parlament pa zë. Në fakt ne jemi parlament pa vesh sepse nuk dëgjojmë njëri-tjetrin kur flitet dhe është shumë e rëndësishme që të kemi mundësinë ta dëgjojmë njëri-tjetrin kur flitet”, tha ajo.
Duke folur për reformën administrativo-territoriale, ajo u shpreh se nuk është marrë asnjë vendim në mënyrë të njëanshme dhe se është zhvilluar dialog i vazhdueshëm mes palëve, madje janë bërë ndryshime sipas kërkesave të opozitës.
“Unë jam anëtare e reformës administrative territoriale, reformës së madhe që po diskutohet tani. Nuk ka asnjë vendim, asnjë vendim që është marrë në mënyrë unilaterale, por gjithmonë ka patur një dialog mes dy bashkëkryetarëve dhe madje është ndryshuar dhe plani fillestar i të gjitha konsultimeve që komisioni do të bënte në territor sipas kërkesave të opozitës dhe nuk e di në qoftë se e keni parë 10 ditë përpara është bërë një mbledhje shumë e gjatë vetëm për të akomoduar ato kërkesa”.
Në Off the Record me Andrea Dangllin në A2 CNN, deputetja socialiste zbuloi edhe prapaskenat e funksionimit të politikës, sipas të cilës kur nuk ka kamera, klima është më e qetë dhe bashkëpunuese, ndërsa me nisjen e transmetimeve, debatet tensionohen dhe palët vendosin maska.
“Jeni i sigurt që është e njëjta gjë që unë shikoja në këshillin në Këshillin Bashkiak të Tiranës që sa s'kishte kamera çdo gjë ishte mjaltë e qumësht. Ndizeshin kamerat, transformoheshin maskat krejt. Megjithatë pra nuk po flasim për arrogancë dhe numrat nuk janë sidomos për reformat e mëdha. Ka një durim në qoftë se mund ta quajmë durim për të arritur një konsensus të përbashkët. sepse duhet kuptuar që demokracia në vetvete do të thotë bashkëjetesë mes palëve dhe do të thotë fitorja e idesë më të mirë. Dhe në qoftë se ne duam të jemi në Bashkimin Europian një ditë, kushti i fundit e di cili është? Kushti i fundit që BE-ja vendos është bashkimi i të gjitha forcave politike në një koalicion mbarëkombëtar ku bie dakord për të gjitha zhvillimet në mënyrë që ne të hyjmë në BE”.
(A2 Televizion)
A2 CNN Livestream
MUND TE LEXONI GJITHASHTU
