Pasi Gjykata e Tiranës liroi sot 14 protestuesit e arrestuar në protestën e 10 shkurtit të opozitës, ka reaguar kreu i Partisë Demokratike Sali Berisha. Gjatë bashkëbisedimit me qytetarët në rrjetet sociale, ai i cilësoi ata “superguximtarë” që u mbajtën në qelitë e komisariateve vetëm për shkak të moshës së tyre, ndërsa akuzoi kryeministrin Rama se kishte urdhëruar torturimin e tyre ne komisariate.
“Sapo mora lajmin se guximtarët e fundit u liruan nga gjykata. Njëherë unë dua të përshëndes përzemërsisht grupin e superguximtarëve të rinjve, adoleshentëve, që u mbajtën në qelitë e zeza vetëm për shkak të moshës së tyre. Edi Rama, për të tmerruar të rinjtë, kishte urdhëruar, donte me çdo kush të rinj që t’i torturonte në komisariate. Të rinjtë që nuk kishin kryer absolutisht asnjë lloj akti dhune. Të rinj, të cilët u morën, fotot që u paraqitën ishin krejtësisht tjetër për tjetër. Nuk u përkisnin atyre që ishin mbajtur. Të rinj që u goditën në komisariat. Të rinj tek të cilët u dërguan gjoja psikologë oficerë të maskuar policie që nuk ishin psikologë. Të rinj që u pyetën pa avoketërit dhe pa prindërit e tyre, duke shkelur çdo ligj, duke treguar se komisariatet, ka prej këtyre oficerëve të policisë që i shndërrojnë në strofulla bandash. Por ata qëndruan të pamposhtur dhe ata dolën dje”, u shpreh Berisha.
Berisha akuzoi policinë dhe veçanërisht Sokol Bizhgën dhe Ilir Prodën për keqtrajtimin e protestuesve, duke përdorur metoda të dhunshme dhe shkelur ligjin, përfshirë prezencën e oficerëve të maskuar sipas tij si psikologë dhe pyetje pa praninë e avokatëve apo prindërve.
“Garantoj se ligji do jetë shumë i rreptë me të gjithë ata që keqtrajtuan. Me të gjithë ata që morën njerëz të pafajshëm në komisariate. Dënoj me forcën më të madhe aktin kriminal, vrastar të Sokol Bizhgës, Ilirian Prodës, këtyre banditëve me uniformë, të cilët prej kohësh duhet të ishin në burg për krimet që kanë kryer. Ata urdhëruan qëllimin me snajper në kokë, në ballë, pas veshi, të tre protestuesve paqësorë dhe të një zonje në krah. Unë i them Sokol Bizhgës dhe Ilirian Prodës, do jeni përgjegjës për plumbat që lëshoni ndaj njerëzve të pafajshëm. Nuk u ndahemi kurrë. Ligji do veprojë mbi ju. Banditë të turpshëm që zbatoni urdhrat e një kryetari të një organizate kriminale siç është Edi Rama. Asgjë nuk do na ndalë ne në rrugën tonë. Tani unë mbetem i hapur për çdo pyetje, por javën tjetër edhe më të mirë do ta kemi. Në jemi në rrugën e drejtë. Ne mbrojmë një kauzë të drejtë”, theksoi Berisha.
(A2 Televizion)
A2 CNN Livestream
MUND TE LEXONI GJITHASHTU
