Me mandatin e katërt qeverisës, Edi Rama nuk ka në plan vetëm ekipin e ri të kabinetit qeveritar, por edhe ristrukturimin e Parlamentit. Burime për A2CNN bëjnë me dije se mazhoranca socialiste po diskuton një draft pune për ndryshimin e komisioneve parlamentare, nga 8 të përhershme në 11 të tillë.
Risia e këtij propozimi lidhet me faktin që PS synon t’i rrëmbejë opozitës drejtimin e Komisionit të Integrimit, përmes mekanizmit të shkrirjes me Komisionin e Jashtëm, që drejtohet nga socialistët.
Edhe Komisioni i Ligjeve pritet të pësojë ndryshime, duke u ndarë në një komision më vete “Për të Drejtat e Njeriut”. Gjithashtu, Komisioni për Veprimtarinë Prodhuese nuk do të ekzistojë më, pasi do të krijohen tre komisione të reja: Burimet Natyrore, Infrastruktura dhe Bujqësia.
Mekanizmi i posaçëm antikorrupsion, që u drejtua nga Fatmir Xhafaj, do të marrë peshë si një komision i përhershëm, por me një emër dhe fushë veprimi më të gjerë. Pjesë e këtij drafti pritet të jenë gjithashtu propozime për ndryshimin e emërtimeve të komisioneve dhe uljen e numrit të anëtarëve.
Kjo qasje e socialistëve për të bërë ndryshime në Kuvend pa diskutuar me opozitën u pasqyrua edhe në mbledhjen e së premtes të Kuvendit të Vjetër, ku morën pjesë vetëm përfaqësues të mazhorancës. Komisioni për Çështjet Europiane, që drejtohet nga demokratja Jorida Tabaku, u mblodh pa dakordësinë e kryetares për të miratuar kuadrin negociues për grup-kapitullin “Burimet, Bujqësia dhe Kohezioni”.
Bojkotin e saj në këtë komision, Jorida Tabaku e shpjegoi me veprimet e kolegëve të mazhorancës, të cilët sipas saj vepruan me urdhër të qeverisë, duke shkelur Kushtetutën.
I sqarova qeverisë që mbledhja e komisionit jashtë sesionit është antikushtetuese! Opozita e ka prioritet procesin e integrimit dhe do të bëjë çdo gjë në dorë të saj, ashtu siç ka bërë në çdo rast për këtë proces! Ofrova disa zgjidhje praktike për të kapërcyer këtë ngërç, por qeveria vazhdoi në mënyrë të njëanshme! Asnjë nga deputetët që sot kanë thirrur mbledhje nuk është i rizgjedhur dhe nuk e ka legjitimitetin për të thirrur mbledhje jashtë sesionit!
Jorida Tabaku, kryetare e Komisionit për Çështjet Europiane
Asambleja e PS-së, që pritet të mblidhet më 11 shtator, mund të shtyjë edhe nisjen e legjislaturës së re të Kuvendit, pasi seanca e parë konstituese, sipas burimeve në Parlament, mendohet të mbahet të premten, më 12 shtator. (A2 Televizion)
A2 CNN Livestream
MUND TE LEXONI GJITHASHTU
