Një pjesë e resortit të ndërtuar pa leje nga ish-kreu i Inspektoratit të Mbrojtjes së Territorit Durrës, u hodh pasditen e të premtes në erë me tritol.
Lidhur me këtë zhvillim ka reaguar edhe kryeministri Edi Rama, i cili përmes një postimi në rrjetet sociale shkruan se puna për mbrojtjen e vendit nga abuzuesit vijon si në Veri, në Jug apo edhe në Shqipërinë e Mesme.
Duke e cilësuar ish-kreun e Inspektoratit të Mbrojtjes së Territorit Durrës, Ardian Halilin si një abuzues që kishte marrë peng disa territore, Rama thekson se ai i është dorëzuar drejtësisë.
“Ca zëra në nisje të kësaj kthese të re thoshin “po pse Thethi e jo Jugu, po pse ashtu e jo kështu”, ndërkohë puna për mbrojtjen e vendit nga abuzuesit vazhdon në Veri, Jug dhe Shqipërinë e Mesme, ku konkretisht në Durrës është vendosur rendi ligjor mbi një territor të marrë peng nga një abuzues, i cili është ndaluar nga Policia e Shtetit e i është dorëzuar drejtësisë edhe si ish-drejtues i inspektorëve të Durrësit”, ka shkruar Rama krahas videos së postuar.
Sipas hetimeve objekti luksoz në një sipërfaqe rreth 5600m2 u ndërtua nga Ardian Halili, në përiudhën 2018-'21 kohë kur mbante pozicionin e kreut të IMT Durrës. Vetë Halili u arrestua nga policia e Durrësit.
Ai është po ashtu bashkëshorti i ish-prokurores së Durrësit, Rabiana Halili, e cila u dorëhoq pak kohë para se të kalonte procesin e vetingut. Prej 4 vitesh ai është larguar nga Bashkia, pas ardhjes në krye të këtij institucioni të Emiriana Sakos. (A2 Televizion)
A2 CNN Livestream
MUND TE LEXONI GJITHASHTU
