Votat e qarkut të Tiranë do të rinumërohen sërish. PD nuk arriti të bindë KAS të shpallte të pavlefshëm rezultatin e zgjedhjeve, por shfrytëzoi dy anëtarët e saj në këtë formacion për të hapur 1282 kutitë e Tiranës me qëllim rinumërimin e të gjitha fletëve.
Një vendim i tillë duket se ka entuziazmuar kandidatin e PD në Tiranë Ilir Alimehmeti, i cili edhe pse mblodhi 18 mijë vota preferenciale, nuk mori dot mandatin e deputetit. Rinumërimi po shihet si një mundësi nga ana e demokratëve për mandatin e 14, që në këtë rast do t’i ikte partisë Mundësia, por do të dërgonte Alimehmetin në Parlament.
Ndërsa Tirana pritet të hapet, Kukësi u mbyll i pandryshuar. Komisioni i Ankimeve dhe Sanksioneve rrëzoi kërkesën e PD për pavlefshmëri duke lënë në fuqi fitoren e opozitës me 2 mandate dhe 1 të PS.
Sipas KAS, provat e paraqitura ishin të pamjaftueshme.
Paralelisht me mbledhjet në KQZ, në magazinat e këtij institucioni në Vaqarr u hapën 229 kuti me kërkesë të demokratëve, për të verifikuar çfarë kishte ndodhur me votat e papërdorura por të pashënuara në procesverbal.
Duke iu referuar procesverbaleve, PD pretendonte se mungojnë 130 mijë fletëve të votimit të papërdorura.
Por hapja e kutive të materialeve zgjedhore tregoi që kishte vetëm neglizhencë të komisionerëve, pasi fletët ishin bashkë me pjesën të tjetër të materialit zgjedhor, por numri i tyre nuk ishte shënuar në kolonën përkatëse të procesverbalit.
Ndërsa KQZ së bashku me numëruesit verifikonin, demokratët nuk u paraqitën në punë për të monitoruar hapjen e kutive.
Pjesë e proceseve ankimuese është edhe një kërkesë e demokratëve për të rinumëruar votat e tyre preferenciale në 44 kuti në Dibër, pavarësisht se në këtë qark, demokratët nuk arritën të fitojnë mandate përtej listës së sigurt.
(A2 Televizion)
A2 CNN Livestream
MUND TE LEXONI GJITHASHTU
