Situata në Kosovë në lidhje me pandeminë mbetet kritike. Një nga ekspertët që e ka monitoruar më mirë situatën është mikrobiologu Lul Raka, që ndan për A2 mendimet e tij për ecurinë e COVID-19.
“Niveli i kërcënimit është ende i lartë, edhe pse kemi ulje të rasteve ditore, dhe të hospitalizimeve. Por kemi rritje të rasteve të vdekjes, dhe faktorët janë të njëjtët: moszbatimi i kënaqshëm i masave parandaluese, sidomos pas lirimit të karantinës, kur në qershor banorët menduan se virusi ishte zhdukur dhe mund t’i riktheheshin jetës normale, ndërkohë që element tjetër është elementi rregullator i mbikëqyrjes, në radhë të parë nga forcat e rendit, sepse dasmat, mortet, vazhdojnë në mënyrë ilegale”, shprehet ai.
Sipas Rakës, “Nga gjitha rastet e verifikuara, 50.5 % kanë qenë asimptomatikë. Ne nuk e testojmë më këtë kategori, dhe flaken e përhapjes e kanë dhënë pikërisht këto, veçanërisht rinia”. Mjeku është i bindur për përhapjen komunitare në Kosovë, por jo vetëm. “Përhapje komunitare? Jo vetëm Kosova, por edhe vendet e tjera të Ballkanit, dhe kjo shihet me shtimin e hospitalizimit, me raste të shpërndara në çdo spital të Kosovës”.
Disa zëra sugjerojnë një karantinë tjetër në rast të shtimit të rasteve, por mjeku nuk është dakord. “Jo. Izolimi në këtë fazë mund të kontribuojë në fazë afatshkurtër, por jo afatgjatë, dhe do të shkaktonte dëme të pariparueshme në gjendjen mentale të popullatës, kur shikojmë rritje të dhunës në familje të lodhura nga gjithë këto muaj”.
Opsioni i vetëm sipas tij është hapja e kontrolluar, dhe jo mbyllja. Jeta duhet të vazhdojë, por me kujdes dhe zbatim të masave, sidomos tek të rinjtë që mund të jenë asimptomatike, sepse pasojat edhe për asimptomatikët mund të jenë më të rënda sesa mendohet.
“Na ka habitur shpejtësia e përhapjes dhe kemi parë që nuk ka organ që nuk goditet, nuk është vetëm mushkëria, por edhe zemra, enët e gjakut, mëlçia, por edhe në tru, edhe në personat që kanë pasur pasqyrë të lehtë klinike”, thotë ai. (A2 Televizion)
A2 CNN Livestream
MUND TE LEXONI GJITHASHTU
