Humbja në derbi rezultoi fatale për Florin Bratun. Partizani ka ndërprerë zyrtarisht bashkëpunimin me trajnerin rumun, vetëm pak muaj pas emërimit të tij në stolin e të kuqve.
Disfata 3-1 ndaj Tiranës ishte goditja e fundit për Bratun, në një fillim sezoni që nuk shkoi sipas pritshmërive. Pas gjashtë javëve të para, Partizani grumbulloi vetëm katër pikë, duke u pozicionuar në vendin e parafundit të renditjes.
Bilanci i trajnerit rumun në kampionat ishte vetëm një fitore, një barazim dhe katër humbje. Skuadra shënoi tetë gola dhe pësoi 13, ndërsa mesatarja prej 0.67 pikësh për ndeshje dëshmon vështirësitë e ekipit në këtë periudhë.
Bratu e nisi aventurën shqiptare më 6 korrik, me një kontratë njëvjeçare dhe opsion rinovimi. Fitorja 3-2 në transfertë ndaj Vllaznisë ishte momenti pozitiv i kësaj eksperience, por nuk mjaftoi për të ndryshuar ecurinë e skuadrës.
Në deklaratën pas derbit, vetë trajneri pranoi përgjegjësinë për rezultatet, duke theksuar se ekipi kishte vështirësi për të gjetur ekuilibrin dhe për të ndaluar kundërshtarët në tranzicion.
46-vjeçari largohet kështu pas vetëm gjashtë ndeshjesh në kampionatin shqiptar, në eksperiencën e tij të parë në futbollin e vendit tonë. Përpara se të mbërrinte në Tiranë, ai kishte drejtuar ekipe në Rumani dhe Qipro, si dhe përfaqësueset e moshave të Rumanisë.
Një aventurë e shkurtër, pritshmëri të mëdha dhe një fund i parakohshëm. Partizani duhet të reagojë shpejt për të mos e komplikuar edhe më shumë sezonin. (A2 Televizion)
A2 CNN Livestream
MUND TE LEXONI GJITHASHTU
