Paris Saint-Germain ka marrë një fitore të rëndësishme 3-1 ndaj Aston Villës në ndeshjen e parë çerekfinale të UEFA Champions League, duke i dhënë fund serisë prej shtatë fitoreve radhazi të skuadrës angleze. Skuadra franceze siguroi një avantazh prej dy golash përpara sfidës së kthimit në Angli.
I rikthyer për herë të parë si kundërshtar ndaj PSG-së, Unai Emery e nisi taktikisht ndeshjen me qëllimin për të neutralizuar presionin e vendasve. Megjithatë, parizienët krijuan disa raste të rrezikshme me Vitinha dhe Dembélé, të ndalur nga portieri Emiliano Martínez. Pavarësisht mungesës së rasteve të qarta, Aston Villa befasoi në minutën e 35-të, kur pas një kundërsulmi të shpejtë, Morgan Rogers shënoi pas një kombinimi të bukur mes McGinn, Rashford dhe Tielemans.
Reagimi i PSG-së erdhi shpejt dhe me stil. Désiré Doué, me një aksion individual spektakolar, dribloi mbrojtjen dhe shënoi një gol të bukur në cepin e sipërm të portës. Pas pushimit, dominimi vazhdoi me Khvicha Kvaratskhelia që mposhti Disasi dhe shënoi golin e dytë.
Në fund, kur dukej se Villa do të mbyllte sfidën me një humbje minimale, Nuno Mendes realizoi golin e tretë pas një pasimi të shkëlqyer nga Dembélé. Me këtë rezultat, PSG e sheh veten favorit për kualifikim. (A2 Televizion)
A2 CNN Livestream
MUND TE LEXONI GJITHASHTU
