Tirana e basketbollit të meshkujve mundi me rezultatin 80-61 Flamurtarin dhe siguroi një biletë për në çerekfinale të Kupës së Shqipërisë.
Për bardheblutë, ky ishte një test përpara ndeshjeve të forta që i presin në këtë kompeticion. Kryeqytetasit dominuan përballë vlonjatëve, duke qenë gjatë gjithë kohës në avantazh, shkruan A2.
Pjesa e parë përfundoi me shifrat 45-25. Edhe pas pushimit, ekipi i Karajt nuk e uli ritmin dhe mbajti diferencën e njëjtë, ndërsa perioda e tretë përfundoi me shifrat 64-42.
Në fund, trajneri Erkand Karaj aktivizoi dhe djemtë e rinj dhe gjithçka u mbyll me rezultatin 80-61.
Për trajnerin Erkand Karaj dhe basketbollistin Riçard Lilaj, Tirana synon çdo trofe dhe forca do të tregohet që në ndeshjen e radhës, kur bardheblutë do të luajnë me Vllazninë në çerekfinale.
Në ndeshjet e tjera, Besëlidhja përballet me Partizanin, Teuta me fituesin e çiftit Elbasani-Skënderbeu, ndërsa Apolonia sfidon Kamzën.
Të gjitha ndeshjet çerekfinale do të luhen të mërkurën, në pallatin e sportit “Tomorr Sinani”, në Elbasan. (A2 Televizion)
A2 CNN Livestream
MUND TE LEXONI GJITHASHTU
