Pasi u shkarkua nga pozicioni i tij si drejtues i ekipit të Formula 1, Red Bull, Christian Horner mund të marrë deri në 70 milionë euro në formë kompensimi për ndërprerjen e kontratës.
Horner u lirua nga detyrat e tij në fillim të javës pas 20 vitesh në krye të ekipit të konstruktorëve, i cili fitoi tetë kampionate për pilotë dhe gjashtë tituj për konstruktorë nën udhëheqjen e tij.
Menaxhmenti i Red Bull nuk i shpjegoi arsyet e largimit të Horner, dhe shkarkimi i tij erdhi një vit e gjysmë pasi u akuzua për ngacmim seksual të një punonjëseje.
Megjithatë, Horner u lirua dy herë nga akuzat, së pari pas një hetimi të brendshëm nga një avokat dhe më pas nga një avokat tjetër i cili e hodhi poshtë ankesën e një punonjëseje të ekipit, ndërsa vetë Horner i ka mohuar me forcë akuzat gjatë gjithë kohës.
Mediat britanike raportojnë se pozicioni i Horner u dëmtua nga rezultatet e dobëta të ekipit dhe pakënaqësia e yllit Max Verstappen, me zhvillimin e makinës dhe situatën aktuale.
Horner kishte edhe 5 vite e gjysmë të mbetura në kontratën e tij dhe avokatët e tij do të këmbëngulin që ta marrë kompensimin e plotë për prishje të njëanshme të kontratës.
Spekulohet se paga e tij është më shumë se 12 milionë euro në sezon, kështu që anglezi 50-vjeçar mund të marrë rreth 70 milionë euro në formë kompensimi për ndërprerjen e kontratës.
Në vend të kësaj, francezi Laurent Mekies u zgjodh si shefi i ri i ekipit Red Bull.
Sipas disa burimeve amerikane, pagesa më e madhe e ndërprerjes së kontratës së punës në historinë e sportit është 77.5 milionë dollarë (66 milionë euro), të cilën e mori Jimbo Fisher, i cili u shkarkua nga pozicioni i tij si trajner i ekipit të futbollit amerikan Texas A&M.
Nëse Hornerit i paguhet shuma e lartpërmendur, ai do të thyente kështu rekordin e Fisher. (A2 Televizion)
A2 CNN Livestream
MUND TE LEXONI GJITHASHTU
