Presidenti serb, Aleksandër Vuçiç, priti në Beograd ministrin e jashtëm gjerman, Heiko Maas. Ata diskutuan për vaksinat anti-covid, integrimin në Bashkimin Europian dhe sigurisht për dialogun Prishtinë-Beograd.
Vuçiç u shpreh I gatshëm të rifillojë bisedimet e ndërmjetësuara nga Brukseli dhe nënvizoi se do të këmbëngulë në implementimin e të gjitha marrëveshjeve të nënshkruara në të kaluarën.
“Serbia nuk kërkon një arsye për të refuzuar arritjen e një kompromisi dhe besojmë se një konflikt i ngrirë nuk është zgjidhja më e mirë pasi gjithmonë dikush mund ta shkrijë atë. Paqja me Kosovën ështëe nevojshme sepse serbët dhe shqiptarët do të jenë dy kombet më të mëdha të rajonit në 100 vitet e ardhshme".
Nga ana tjetër, Maas tha se dialogu nuk duhet të nisë edhe njëherë nga e para, duke iu përgjigjur kështu kërkesës së presidentes së Kosovës, Vjosa Osmani.
“Ky dialog është zhvilluar prej një kohe të gjatë dhe nuk ka nevojë që të rifillojë nga e para. Sigurisht, qeveritë e të dyja shteteve do të pranojnë gjithçka që është arritur deri më tani dhe të zhvillojnë më tej qëndrimet e tyre. Dukshëm, ky konflikt ka vijuar për një kohë të gjatë dhe nuk kemi nevojë që të ripërjetësojmë ndonjë gjë.”
Ministri gjerman nënvizoi se ky është momenti i duhur për të vijuar bisedimet dhe për të arritur rezultate konkrete pasi ka stabilitet politik në të dyja shtetet. Ndërsa mesazhi që dha gjatë vizitës në Kosovës ishte se ideja e shkëmbimit të territoreve është e rrezikshme dhe jo realiste teksa për dialogun Prishtinë-Beograd, Maas tha se duhet të përmbyllet me njohje reciproke. (A2 Televizion)
A2 CNN Livestream
MUND TE LEXONI GJITHASHTU
