Që nga lëshimi i tij në hapësirë, astronomët e kanë përdorur teleskopin James Webb për të shikuar pas në kohë, në ditët e hershme të krijimit të universit. Dhe, kësaj here ata kanë pikasur diçka që nuk e prisnin.
Vëzhguesi i hapësirës ka zbuluar gjashtë galaktika masive që kanë ekzistuar mes 500- 700 milionë vite pas shpërthimit “big bang” që krijoi universin.
Sipas një studimi të publikuar të mërkurën në revistën shkencore Nature, zbulimi në fjalë po përmbys plotësisht teoritë ekzistuese rreth origjinës së galaktikave.
"Këto objekte janë shumë më masive nga sa pritej", tha në një deklaratë bashkautori i studimit Joel Leja, asistent profesor i astronomisë dhe astrofizikës në Universitetin e Penn State.
“Ne prisnim vetëm të gjenim galaktika të vogla, të reja, foshnja në këtë pikë të kohës, por kemi zbuluar galaktika po aq të pjekura sa galaktikat tona në atë që më parë mendohej se ishte agimi i universit."
Teleskopi vëzhgon universin në dritën infra të kuqe, e cila është e padukshme për syrin e njeriut dhe është në gjendje të zbulojë dritën e dobët nga yjet dhe galaktikat e lashta.
Duke shikuar në universin e largët, observatori në thelb mund të shohë prapa në kohë deri në rreth 13.5 miliardë vjet më parë. (Shkencëtarët kanë përcaktuar se universi është rreth 13.7 miliardë vjeç.)
Galaktikat e zbuluara janë aq masive saqë bien ndesh me 99% të modeleve që përfaqësojnë galaktikat e hershme në univers, që do të thotë se shkencëtarët duhet të rimendojnë se si u formuan dhe u evoluan galaktikat.
Teoria aktuale sugjeron se galaktikat filluan si re të vogla yjesh dhe pluhuri që u rritën me kalimin e kohës.
"Ne hodhëm sytë për herë të parë në universin shumë të hershëm dhe nuk e kishim idenë se çfarë do të gjenim", tha Leja.
“Rezulton se kemi gjetur diçka kaq të papritur, saqë në fakt krijon probleme për shkencën. Ai vë në pikëpyetje të gjithë pamjen e formimit të hershëm të galaktikave.”
Është gjithashtu e mundur që galaktikat e identifikuara me të dhënat e Webb-it të jenë në fakt diçka krejtësisht tjetër.
"Kjo është pamja jonë e parë deri tani, kështu që është e rëndësishme që ta mbajmë mendjen e hapur për atë që po shohim", tha Leja.
“Ndërsa të dhënat tregojnë se ato janë galaktika të mundshme, unë mendoj se ekziston një mundësi reale që disa prej këtyre objekteve të rezultojnë të jenë vrima të zeza supermasive të errësuara.” (A2 Televizion)
A2 CNN Livestream
MUND TE LEXONI GJITHASHTU
