Amerika po shënon shifra rekord të rasteve më Covid-19, e megjithatë presidenti Donald Trump vazhdon të minimizojë pandeminë, dhe u kërkon shteteve të shmangin izolimin.
Ndërsa vijon pa u ndalur fushatën në "shtetbeteja" kryesore, kreu i Shtëpisë së Bardhë u tall me rregullin e mbajtjes së maskës dhe tha se nëse Biden fiton, për amerikanët nuk do të ketë festë Falënderimesh e as Krishtlindjesh.
”Nëse votoni për Biden, do të thotë se nuk ka fëmijë në shkolla, nuk ka martesa, Ditë Falënderimesh, Krishtlindje apo 4 Korrik. Përndryshe, ju do të keni një jetë te mrekullueshme!”, deklaroi Trump.
Biden replikoi në Delaware, ku edhe hodhi votën e tij. Ai tha se veprimet e Trump ishin fyese për viktimat e COVID-19, ndërsa paralajmëroi se pandemia nuk mund të ndalet me një të shtypur të butonit.
“Edhe nëse fitoj, do të duhet shumë punë për t’i dhënë fund kësaj pandemie. Por premtoj se do të nisim që në ditën e parë të bëjmë gjënë e duhur”, tha Biden.
Demokrati ka një përparësi të qëndrueshme ndaj rivalit republikan, 6 ditë para zgjedhjeve të 3 nëntorit. Megjithatë epërsia mbetet më e ngushtë në një sërë shtetesh, që konsiderohen si vendimtare për garën presidenciale.
Një numër rekord prej 75 milionë amerikanësh kanë votuar para kohe, 50 milionë prej të cilëve me postë, ndërsa vdekjet si pasojë e koronavirusit po rriten në 39 shtete amerikane, me një mesatare ditore prej 800 humbje jetësh në mbarë vendin.
Eksperti më i lartë i sëmundjeve infektive, Anthony Fauci, tha për BBC të mërkurën, se tubimet politike të Trump do të përhapnin edhe më tej sëmundjen, duke konsideruar pjesëmarrjen masive dhe mosrespektimin e rregullave anti-COVID. (A2 Televizion)
A2 CNN Livestream
MUND TE LEXONI GJITHASHTU
