Nga dita e hënë do të nisë aplikimi i testeve të shpejta në kryeqytet. Specialistja e Shëndetit Publik, Marjeta Dervishi, në një lidhje direkte me "Ditari" në A2, deklaroi se kushti i vetëm i aplikimit të tyre është që të kryhen brenda 5-ditëshit të parë të simptomave.
“Testi i shpejtë kryhet brenda 5 ditëve nga fillimi i shenjave dhe ka të njëjtën siguri si testet e tjera, por vetëm me kushtin që të kryhet brenda 5-ditëshit të parë të simptomave. Ky test i shpejtë i njohur nga OBSH ka një efikasitet 100%, nuk ka dyshime për diagnozën”, sqaroi Dervishi.
Ajo tha se janë 100 mijë teste të shpejta antigeni dhe do të jetë mjeku i familjes dhe Urgjenca që do të referojnë kryerjen e testimit në pikat e paracaktuara: “Janë 100 mijë teste të shpejta për diagnozë dhe në këtë rast do të jetë mjeku i familjes apo 127 që do të referojnë për kryerjen e testimit me teste të shpejta në pikat e paracaktuara. Çdo person që ka shenja dhe simptoma, t’i drejtohet mjekut të familjes nëse është brenda 5 ditëve nga dita e parë e shenjave dhe simptomave. Nëse kemi më shumë se 5 ditë, do të mbetemi te tamponi dhe PCR”.
Testi i shpejtë kryhet brenda 30 minutave dhe sipas specialistes Dervishi, kjo bën të mundur që të kryhet edhe hetimi epidemiologjik në kohë reale. (A2 Televizion)
A2 CNN Livestream
MUND TE LEXONI GJITHASHTU
