Sirenat e alarmit kumbuan në të gjithë Kievin mëngjesin e hershëm të së dielës. Përgjegjëse për këtë ishte ushtria e Rusisë, që lëshoi një sulm masiv me dronë në kryeqytetin e Ukrainës. Të paktën 10 shpërthime janë dëgjuar, me mbetjet që ranë në lagje të ndryshme. Zyrtarët në Kiev nuk raportojnë për viktima apo për të lënduar, por pas sulmit, shpërtheu një zjarr i madh në një ndërtesë banimin, që më pas u shua.
“Ishte një përvojë shumë e frikshme, as nuk mund ta përshkruaj me fjalë. Dëgjova një tingull ‘motorik’ duke fluturuar sipër, një zhurmë shurdhuese. Më pas pati një shpërthim të fuqishëm, i ndjekur nga një blic i madh drite. Unë jetoj në katin e parë dhe vala e shpërthimit ishte aq e fortë sa xhami filloi të bjerë poshtë. Perdja ime e dritares u këput dhe kavanozët që kisha në dritaren time u thyen”, tha Liudmyla, banore në Kiev.
Ushtria e Volodymyr Zelensky-t thotë se sulmi ishte tepër intensiv dhe se ka zgjatur gjithë natën. Forcat ruse lëshuan 32 dronë kamikazë iranianë Shahed në drejtim të Kievit, 25 prej të cilëve janë rrëzuar nga mbrojtja ajrore. Ndërkohë, edhe Moska pretendon se ka shkatërruar tetë dronë të lëshuar nga Ukraina në Detin e Zi, në afërsi të gadishullit të Krimesë së aneksuar.
Gjithashtu, Ministria ruse e Mbrojtjes njoftoi se ka shkatërruar 3 anije që po i drejtoheshin Krimesë, të cilat kishin ushtarë ukrainas në bord. Kreu i inteligjencës ushtarake në Kiev, Kyrylo Budanov, thotë se nuk beson që kjo luftë do të zgjasë për shumë gjatë. Këtë qëndrim e bazon në të dhënat që posedon, kryesisht për armikun, ndërsa konfirmon se kundërofensiva e ushtrisë do të vazhdojë edhe gjatë dimrit, pavarësisht se pranon që do të jetë tepër e vështirë që të ecet përpara në çlirimin e territorit. (A2 Televizion)
A2 CNN Livestream
MUND TE LEXONI GJITHASHTU
