“Rënia e lirë” e eksporteve shqiptare si pasojë e zhvlerësimit të euros vijoi edhe në shtator, për të tetin muaj me radhë.
Të dhënat nga Instituti i Statistikave tregojnë se muajin e shkuar kompanitë shqiptare çuan jashtë mallra në vlerën e vetëm 33.6 miliardë lekëve nga më shumë se 38 miliardë shtatorin e një viti më parë. Humbja përllogaritet në 5.1 miliardë lekë apo rreth 48 milionë euro.
Tkurrja që përfshiu thuajse të gjitha kategoritë e mallrave, u bë me e dukshme se kurrë muajin e shkuar te eksportet e mineraleve dhe industria e veshjeve dhe këpucëve, ndjekur nga ushqimet e pijet dhe produktet kimike e plastike.
“Kjo nuk është surprizë. Është një shqetësim i ngritur prej muajsh nga shoqatat eksportuese. Mbiçmimi i monedhës kombëtare, lekut i bën mallrat tanë më pak konkurrues. Kjo ecuri rënëse e eksporteve të mallrave do të vijojë së paku edhe deri në mesin e vitit të ardhshëm”, tha Eugen Musta, pedagog ekonomie.
E njëjta ecuri ka përfshirë edhe kahun tjetër, atë të importeve. Pavarësisht shtimit të konsumit si pasojë e turistëve, por edhe rënien së inflacionit në eurozonë, importet e mallrave në shtator u tkurrën me 14.6 miliardë lekë. Në vend hynë më pak karburante, materiale ndërtimi, ushqime dhe lëndë e parë për fasonët dhe industrinë kimike e plastike gjatë muajit të shkuar.
“Dhe ajo më paradoksalja është se me gjithë rënie e çmimit, mallrat e importit vijojnë të tregtohen më shtrenjtë në vend duke thyer çdo rregull të ekonomisë së tregut”, u shpreh Musta.
Rënia më e fortë e eksporteve muajin e shkuar, bëri që bilanci i tregtisë së jashtme, pra raporti mes asaj çka shitëm dhe blemë me jashtë të mbyllej në një deficit prej 39.7 miliardë lekësh. (A2 Televizion)
A2 CNN Livestream
MUND TE LEXONI GJITHASHTU
