21 ditë luftime, çfarë ka ndodhur sot?

Kjo është një përmbledhje e zhvillimeve kryesore më të fundit në ditën e 21-të të pushtimit rus ndaj Ukrainës. (A2 Televizion)

• Presidenti i Ukrainës, Volodimir Zelensky, i ka bërë thirrje zyrtarëve të lartë rusë dhe figurave mediatike të Rusisë që të japin dorëheqjen nga pozicionet e tyre dhe të mbajnë qëndrim për pushtimin rus të Ukrainës.
  
• Të burgosurit rusë të luftës kanë shprehur pendesë për krimet e kryera në Ukrainë dhe i kanë bërë thirrje presidentit rus që të ndalojë aktet terroriste në Ukrainë.
  
• Kryeministrat e Polonisë, Sllovenisë dhe Republikës Çeke u takuan me presidentin Volodimir Zelensky mbrëmjen e së martës, teksa në qytet kishte nisur shtetrrethimi.
  
• Një këshilltar i Presidentit ukrainas Volodymyr Zelensky ka thënë për mediat lokale se propozimi i Rusisë që Ukrainë të ketë një neutralitet “të modelit austriak” është i papranueshëm për vendin.
  
• Presidenti ukrainas i kërkoi ligjvënësve amerikanë, në një fjalim virtual në Kongres, që të kujtonin sulmin në Pearl Harbor gjatë Luftës së Dytë Botërore dhe sulmin mbi Kullat Binjake, në vitin 2001, duke i bërë thirrje SHBA-së që të bënte më shumë.
  
• Ministri i Jashtëm rus, Sergei Lavrov, tha se një takim mes Presidentit Putin dhe homologut Zelensky mund të ndodhë vetëm për të nënshkruar një marrëveshje specifike.
  
• Papa Françesku foli për frikën e një lufte bërthamore duke paralajmëruar se një fatkeqësi e tillë mund të shuante gjithçka në tokë.
  
• Në një intervistë për mediat ruse, presidenti Putin përsëriti qëndrimin se qëllimi i Rusisë në Ukrainë nuk është ta pushtojë atë, duke renditur arsyet e çmilitarizimit, neutralitetit dhe denazifikimit të saj.
  
• Një tjetër lajm i rëndë vjen nga lufta në Ukrainë, ku forcat ruse raportohet të kenë bombarduar një teatër në qendër të Mariupolit, ku kishin gjetur strehim qindra civilë.
  
• Ndërsa ritheksoi pozicionimin e SHBA-ve kundër vendosjes së zonës së ndalimit të fluturimeve mbi Ukrainë, Biden deklaroi këtë të mërkurë se Amerika do t’i japë 1 miliard dollarë Ukrainës përmes paketës së re të armëve me rreze të gjatë veprime dhe dronëve.
  
• Presidenti i Shteteve të Bashkuara të Amerikës, Joe Biden e ka quajtur për herë të parë homologun rus, Vladimir Putin një kriminel lufte, një frazë të cilën administrata ishte shmangur disa herë ta përdorte edhe pse ishte pyetur drejtpërdrejt nga gazetarët.
  
• Kremlini ka reaguar menjëherë pas deklaratës së presidentit të Shteteve të Bashkuara të Amerikës, Joe Biden, i cili e quajti për herë të parë homologun rus, Vladimir Putin një kriminel lufte. Sipas Kremlinit zyrtar, deklarata të tilla në drejtim të Putin janë të papranueshme dhe të pafalshme.