12 ditë luftime, çfarë ka ndodhur sot?

Kjo është një përmbledhje e zhvillimeve kryesore më të fundit në ditën e 12-të të pushtimit rus ndaj Ukrainës. (A2 Televizion)

• Pas 12 ditësh luftime, Ukraina rrezikon të preket nga një tjetër krizë që kësaj here ka të bëjë me mungesën e ushqimeve.

• Zyrtarë amerikanë të inteligjencës informojnë se autoritetet ruse kanë nisur rekrutimin e mercenarëve nga Siria, të aftë për luftë urbane, si pjesë e përgatitjeve të Moskës për të nisur sulmin intensiv për të marrë kontrollin e qyteteve kryesore të Ukrainës.
• Ka shkuar në 1.7 milionë numri i ukrainasve të larguar nga vendi për të shpëtuar nga luftimet e ashpra që kanë përfshirë Ukrainën prej 24 shkurtit.
• Qeveria ruse miratoi një listë të vendeve dhe territoreve të huaja që kryejnë veprime jomiqësore kundër shtetit, kompanive dhe qytetarëve rusë. Në të bën pjesë dhe Shqipëria, Maqedonia e Veriut dhe Mali i Zi, nga rajoni i Ballkanit Perëndimor. 
• Zëdhënësi i Kremlinit, Dmitry Peskov, është shprehur se Ukraina duhet të njohë Krimenë si pjesë të Rusisë dhe Donetsk dhe Luhansk, si shtete të pavarura.
• Organizata e Kombeve të Bashkuara (OKB) ka njoftuar se 406 civilë janë vrarë që nga nisja e pushtimit rus në Ukrainë, në 24 shkurt.
• Konsullata e nderit e Shqipërisë në Kharkiv është shkatërruar nga bombardimet ruse, tha Ministria e Jashtme në një njoftim në Twitter.

• Rusia dhe Ukraina kanë mbajtur një raund të tretë të negociatave për paqe, por pak thuhet se është rënë dakord. Një raund i katërt i bisedimeve do të zhvillohet nesër në Bjellorusi, sipas një negociatori nga Moska.
• Çmimet e naftës janë rritur në nivelin më të lartë të 13 viteve për shkak të krizës.