Ndahet nga jeta në moshën 86-vjeçare Patrick Stewart, ikona e “Star Trek” dhe “X-Men”

Aktori i njohur britanik Patrick Stewart, i famshëm për rolin e kapitenit Jean-Luc Picard në serialin “Star Trek” dhe Profesor X në sagën “X-Men”, është ndarë nga jeta në moshën 86-vjeçare.

Lajmi është konfirmuar nga zëdhënësja e tij, Kelly Bush Novak, sipas së cilës aktori ndërroi jetë të mërkurën në mbrëmje, në banesën e tij në Los Angeles, pas një beteje me sëmundjen e Alzheimerit dhe demencën, shkruan A2 CNN.

Stewart u bë i njohur në mbarë botën përmes serialit fantastiko-shkencor “Star Trek: The Next Generation”, i transmetuar nga viti 1987 deri në vitin 1994. Interpretimi i tij si kapiteni i anijes kozmike Enterprise e shndërroi në një prej figurave më të dashura të ekskluzivitetit. Shprehja e tij karakteristike “Make it so” u kthye në një nga frazat më të njohura të serialit.

Më vonë, ai fitoi një tjetër brez fansash përmes rolit të Profesor X, mentorit të mutantëve në filmat “X-Men”. Stewart vijoi të interpretonte personazhin edhe në serialin “Star Trek: Picard”, ndërsa pritej të shfaqej sërish si Profesor X në filmin e ardhshëm “Avengers: Doomsday”.

I lindur në vitin 1940 në Mirfield të Anglisë, karriera e Stewart zgjati më shumë se gjashtë dekada. Përpara famës televizive dhe kinematografike, ai ishte një aktor i vlerësuar teatri dhe pjesë e kompanisë prestigjioze Royal Shakespeare Company, ku interpretoi në shumë vepra të dramaturgut William Shakespeare.

Në vitin 2010, Mbretëresha Elizabeth II e nderoi me titullin kalorës për kontributin e tij në artin dramatik, duke u bërë Sir Patrick Stewart. Gjatë karrierës fitoi edhe tre çmime Olivier për interpretimet teatrale.

Lajmi për vdekjen e tij ka sjellë reagime nga kolegë dhe artistë të shumtë. Aktori William Shatner e cilësoi një mik, koleg dhe artist të jashtëzakonshëm, ndërsa Ian McKellen, me të cilin Stewart kishte një miqësi të ngushtë prej vitesh, e kujtoi si një njeri që shprehte hapur ndjenjat dhe që mund të admirohej e dashurohej.

Përtej skenës dhe ekranit, Stewart kishte folur publikisht edhe për dhunën në familje që kishte përjetuar gjatë fëmijërisë, duke e përshkruar aktrimin si strehën që i kishte dhënë mundësinë të largohej nga përvojat e vështira. (A2 Televizion)