Paul McCartney bëhet miliarder, legjenda e The Beatles renditet muzikanti i tretë më i pasur në botë

Paul McCartney ka hyrë zyrtarisht në radhët e miliarderëve, duke u renditur si muzikanti i tretë më i pasur në botë. Sipas vlerësimit të revistës Forbes, pasuria e legjendës 84-vjeçare të grupit The Beatles ka arritur në 1,4 miliardë dollarë.

Në klasifikimin e muzikantëve më të pasur, McCartney renditet pas Jay-Z, pasuria e të cilit vlerësohet në 2,8 miliardë dollarë, dhe Taylor Swift, me rreth 2 miliardë dollarë.

Sipas Forbes, pasuria e këngëtarit dhe kompozitorit britanik është rezultat i një karriere të jashtëzakonshme muzikore, vendimeve të suksesshme në biznes dhe investimeve në art dhe pasuri të paluajtshme.

Rruga drejt këtij suksesi financiar nuk ka qenë e lehtë. Pavarësisht famës dhe suksesit të jashtëzakonshëm të The Beatles gjatë viteve '60, anëtarët e grupit përfituan shumë pak nga shitjet e albumeve të tyre në fillimet e karrierës. Kontrata e parë diskografike, sipas Forbes, u siguronte më pak se një qindarkë për çdo album të shitur.

Për të ndryshuar këtë situatë, në vitin 1969 McCartney themeloi kompaninë e tij të botimeve muzikore, MPL Communications, përmes së cilës nisi të administronte drejtpërdrejt të drejtat e pronësisë intelektuale dhe të përfitonte më shumë nga honoraret.

Kompania u zgjerua ndjeshëm ndër vite, duke blerë të drejtat e autorit për mijëra këngë, përfshirë katalogun muzikor të Buddy Holly, një prej artistëve që ndikuan në krijimin e The Beatles. MPL zotëron gjithashtu të drejtat për këngë të njohura të Krishtlindjeve, si dhe për muzikalet “Grease” dhe “Annie”.

Një tjetër burim i rëndësishëm të ardhurash janë të drejtat mbi këngët e The Beatles. Forbes vlerëson se vetëm pjesa e McCartney-t nga të drejtat e autorit i siguron të paktën 10 milionë dollarë në vit.

Ndërkohë, kompania Apple Corps, në të cilën ka pjesë edhe McCartney, gjeneron mbi 50 milionë dollarë në vit nga platformat e transmetimit, shitjet e disqeve dhe produktet promocionale.

Pasuria e tij plotësohet edhe nga prona të paluajtshme në Mbretërinë e Bashkuar dhe në Hamptons të SHBA-së, si dhe nga një koleksion arti ku përfshihen vepra të Pablo Picasso-s dhe René Magritte-it.

Nga një djalë i rritur në një familje punëtore në Liverpool, McCartney është shndërruar në një prej figurave më të pasura dhe më me ndikim të industrisë muzikore botërore. (A2 Televizion)