Për qindra ushtarë ukrainas të uzinës Azovstal të Mariupolit, makthi mund të ketë përfunduar. Janë 264 ushtarët e Kievit, më së shumti pjesë e batalionit Azov, që kanë lënë kompleksin gjigant industrial për shkak të gjendjes së rëndë shëndetësore në të cilën gjenden, pas pothuajse 2 muaj sulmesh të njëpasnjëshme të forcave ruse.
Hapjen e një korridori humanitar e kishte deklaruar pasdite vetë ministri i mbrojtjes rus, Sergej Shoigu.
“Sot pas një seri negociatash me palën ukrainase kemi dakordësuar transferimin e ushtarakëve të plagosur nga uzina, ushtarakët do të dërgohen në republikën popullore të Donjeckut dhe do të kurohen sipas nevojës”, deklaroi ai.
Kjo gjë ka ndodhur, dhe ushtarakët janë transportuar me autobusë fillimisht në zonat e kontrolluara nga forcat proruse të Donbasit, dhe më pas janë shkëmbyer me ushtarë rusë duke u kthyer në zona të kontrolluara nga Kievi.
Mbetet ende i paqartë numri i ushtarakeve që ndodhen në Azovstal dhe nëse pas transportit të plagosurve do të rifillojnë sulmet ruse apo uzina do të braktiset nga të gjithë ushtarakët ukrainas. (A2 Televizion)
A2 CNN Livestream
MUND TE LEXONI GJITHASHTU
