Sekretari i Përgjithshëm i NATO-s, Jens Stoltenberg, pret të mërkurën në Bruksel liderët e Kosovës dhe Serbisë, mes tensioneve të shtuara për vendimet e reciprocitetit në kufi. Stoltenberg do të zhvillojë takime të ndara me kryeministrin e Kosovës, Albin Kurti, dhe presidentin e Serbisë, Aleksandar Vucic. Pas secilit takim, është paralajmëruar se do të ketë koncerencë për shtyp.
Fillimisht, Stoltenberg do të takohet me Vucicin në orën 15:30, ndërsa takimi me Kurtin është parashikuar në orën17:00. Bisedimet në selinë e NATO-s vijnë një ditë para se Kurti dhe Vucic, të ulen në të njëjtën tryezë si pjesë e dialogut të ndërmjetësuar nga Bashkimi Evropian.
Pritshmëritë e analistëve ndërkombëtar për rezultate të mundshme janë të ulta. “Ky proces është qesharak. Që në fillim nuk janë përcaktuar se cilat janë qëllimet e dialogut. Qëllim i qartë duhet të jetë njohja reciproke dhe sovraniteti për Kosovën dhe Serbinë. Nëse Serbia nuk është e përgatitur ta pranojë këtë, është humbje kohe të gërmojmë skajet e marrëveshjeve të vogla”, shprehet eksperti amerikan David Philips.
Në takimin që do të zhvillohet të enjten në Bruksel do të marrin pjesë gjithashtu shefi i politikës së jashtme të BE, Josep Borrell dhe përfaqësuesi i posaçëm për dialogun Miroslav Lajcak. Në faqen zyrtare të Bashkimit Europian bëhet e ditur se takimi do të nisë në orën 10:30 dhe do të fokusohet në rrugën përpara në dialog dhe arritjen e një marrëveshjeje gjithëpërfshirëse të normalizimit të marrëdhënieve mes Kosovës dhe Serbisë.
Gjatë takimit do të trajtohen gjithashtu mosmarrëveshjet aktuale, për çështjen e targave dhe dokumenteve të hyrje-daljeve në kufi dhe do të synohet zbutja e tensioneve mes palëve.
Përfaqësuesi i lartë i BE-së do të zhvillojë gjithashtu takime të veçanta me secilin lider dhe në fund, Borrell do të mbajë një konferencë për mediat. (A2 Televizion)
A2 CNN Livestream
MUND TE LEXONI GJITHASHTU
