COVID-19 po përhapet me shpejtësi, ish-zv.ministrja Gaga: Me shumë mundësi do na duhet një dozë e re vaksine në vjeshtë!

Një nënvariant i ri i koronavirusit ka ngritur shqetësim të madh mes shkencëtarëve. Lloji i ri i identifikuar me emrin “Eris”, po përhapet me shpejtësi në Evropë dhe Azi.

Ish-zëvendësministrja e Shëndetësisë në Greqi, Mina Gaga, theksoi për ERT se duhet të mendojmë se koronavirusi është ende mes nesh, por shifrat nuk janë alarmante.

Gaga shprehu besimin e saj se do të kemi nevojë për një dozë të re të vaksinës së koronavirusit në vjeshtë, ashtu siç kemi për gripin.

Sipas raportit javor epidemiologjik të EODY, ka një rritje të pozitivitetit të mostrave për SARS-CoV-2 dhe të shtrimeve në spitale.

11% e rasteve SARS-CoV-2 janë për shkak të nënvariantit të ri Eris dhe rastet e regjistruara deri më sot janë 41, të gjitha nga Kreta. Rezultate priten edhe nga rajone të tjera.

Numri i pranimeve për COVID-19 (n=469) tregoi një rritje nga java e kaluar dhe një rritje 78% nga numri mesatar javor i pranimeve të reja gjatë 4 javëve të mëparshme.

Ndërkohë, numri i intubimeve të reja (n=8) tregoi një rënie në krahasim me javën e kaluar dhe një rritje 33% krahasuar me numrin mesatar javor të intubimeve të reja gjatë 4 javëve të mëparshme.

Numri i pacientëve të intubuar me infeksion COVID-19 është 18. Ka pasur 22 vdekje me një moshë mesatare 86 vjeç (varg 69-97 vjeç).

Javët e fundit të gjitha shtamet e sekuencuara i përkisnin nënvarianteve Omicron BA.2 dhe BA.5, ku mbizotëronte BA.2.

Nënvarianti më i shpeshtë BA.2 ishte XBB.1.5 (77%), i ndjekur nga XBB.1.16 (11%) dhe EG.5.1 (11%).

Lidhur me nënvariantin e ri të shtamit Omicron EG.5.1,  të dhënat qëndrojnë si më poshtë:

a) Nuk ka asnjë tregues që shkakton sëmundje më të rënda

b) Në Mbretërinë e Bashkuar rritja e nënvariantit specifik u shoqërua me rritje të sëmundshmërisë në komunitet

c) Gjithsej 41 mostra pozitive të nënvariantit EG.5.1 janë regjistruar në Greqi.

d) Nga rezultatet e analizës gjenomike, 94% lidhet me mostrat e dërguara nga Laboratori Virologjik – PEDY i Kretës. Priten rezultatet e analizave të mostrave nga pjesa tjetër e vendit.

Mbikëqyrja e ngarkesës virale në ujërat e zeza komunale tregoi një rritje të qarkullimit të virusit SARSCoV-2. Ajo u vu re në 9 nga 10 zonat e testuara. (A2 Televizion)