Depolitizimi i trupës zgjedhore, konsensusi ende larg, shkak mosbesimi tek administrata publike

Përfundimi i zgjedhjeve të Rrogozhinës shënoi edhe mbylljen e procesit elektoral të vendoreve të 14 majit, ku edhe këtë herë, problematika kryesore në administrimin e procesit zgjedhor lidhej me komisionerët e partive politike.

Prej vitesh në tryezat e partive politike qëndron një rekomandim i OSBE-ODIHR i cili shprehet se administrimi i zgjedhjeve duhet të bëhet nga persona apolitik.

Ky rekomandim u bë pjesë e reformës elektorale të qershorit 2020 ku PS-PD ranë dakord që në parlamentaret e vitit 2025 të kishte një depolitizim të administratës zgjedhore, duke zëvendësuar njerëzit e partive me punonjës të administratës publike. 

Kanë mbetur më pak se dy vite nga këto zgjedhje dhe zbatimi në praktikë i kësaj pike duket të jetë i largët. Pengesa qëndron te mungesa e besimit në një administratë publike të depolitizuar, që do të zëvendësonte njerëzit e partive, siç tregojnë këto qëndrime të pak ditëve më parë në Parlament.

Administrimi i zgjedhjeve nga persona apolitik është një model që garanton sukses dhe garanton një përshpejtim të daljes së rezultatit të zgjedhjes.

Taulant Balla, 13 korrik 2023.

Ka qenë pikërisht kjo që në vitin 2020 që në atë marrëveshje të 5 qershorit, BE ka sjellë me shkresë qëndrimin që nuk mund të zbatohet propozimi i PS për depolizitim sepse administrata publike që do të përfshihej ishte e politizuar.

Oerd Bylykbashi, 13 korrik 2023.

Mosdakordësia politike afekton direkt punën e Komisioni Qendror të Zgjedhjeve. Ilirjan Celibashi prej vitesh ka kërkuar nga politika që komisionet e qendrave të votimit dhe grupet e numërimit të mos jenë nën varësinë e plotë politike.

Një model miks i cili nga njëra anë garanton edhe interesin e partive politike dhe kjo është gjë e mirë në vlerësimin tim, por nga ana tjetër, kjo e drejtë e tyre të mos jetë siç është sot pasi nuk garanton një menaxhim të mirë të procesit zgjedhor.

Ilirjan Celibashi, tetor 2021.

Ndonëse kanë kaluar dy vite nga ky propozim, gjetja e një formule tjetër për funksionimin e komisioneve zgjedhore vijon të jetë një ndër sfidat e reformës elektorale që pritet të rifillojë në muajin shtator në sesionin e ardhshëm parlamentar. (A2 Televizion)