Sorina Koti është një nga deputetet e reja të grupit parlamentar të Partisë Demokratike, por nuk ngurron të tregojë hapur zgjedhjen për të marrë pjesë në të dyja kuvendet e thirrura, një nga Sali Berisha dhe 4200 delegatët për të cilat firmat janë dorëzuar prej javësh në seli, dhe kuvendin e datës 18 dhjetor, atë të thirrur nga Basha.
Si anëtare e Këshillit Kombëtar të PD-së prej vitit 2017, ajo thotë se ka përgjegjësi që të jetë aty ku janë demokratët. “I kam kërkuar edhe zotit Berisha një lloj konsensusi, pasi për herë të parë politikës shqiptare po i ndodh një debat i kësaj forme. Nëse do të ndodhë që do të mblidhemi më datë 11, patjetër që edhe ne duhet të jemi. Patjetër edhe në datë 18 është një kuvend i mbledhur nga kryesia e partisë. Nuk ka rëndësi nëse e firmos formularin apo jo, ai që ka mandatin për të qenë delegat në kuvendin e partisë nuk ka nevojë të plotësojë formularë”, tha Koti në një intervistë për A2 CNN. “Nuk mund të them që vendimi im është parë me sy kritik, pasi nuk kam pasur reagim nga kolegë apo zoti Basha”.
Sipas saj, nga ky debat, Partia Demokratike do të përfitojë. “Njerëzit kishin vite që ishin larguar nga partia, por kam parë që po na rikthehen. Ndoshta pas këtyre dy kuvendeve partia do të dalë më e fortë. E vendos baza se ku do të vendosë të jetë më shumë. Të gjithë janë lënë të lirë të zgjedhin, nuk i është bërë presion. Është logoja e PD-së që ka më shumë rëndësi për ne”. (A2 Televizion)
A2 CNN Livestream
MUND TE LEXONI GJITHASHTU
