Klubi i Tiranës ka reaguar pas dënimeve nga Komisioni i Disiplinës për ngjarjet e ndodhura në takimin Tirana-Bylis, e cila u mbyll me rezultatin e barabartë 2-2, sfidë ku nuk munguan tensionet për shkak të një penalltie të akorduar për skuadrën ballshiote. Pas akordimit të penalltisë, në fushë u krijua panik, që vijoi më tej në fundin e ndeshjes, ku nuk mungoi dhuna ndaj kryesorit Kridens Meta.
Pas këtyre episodeve, reagoi edhe Komisioni i Disiplinës, që dënoi rëndë Tiranën. Kështu, gjashtë lojtarë të bardhebluve dhe tre pjesëtarë të stafit janë pezulluar me nga 4 ndeshje deri në 2 vite, përkatësisht Visar Bekaj, Albano Aleksi, Aldi Gjumsi, Bruno Lulaj, Besir Iseni, Florent Hasani, Arzen Vocaj, Kostandinos Jani dhe Marvi Kastrati.
Në njoftimin e Dispilinës thuhet po ashtu se, Tirana do të zhvillojë ndeshje pa tifozë në harkun kohor të 90 ditëve, si masë paraprake, ndërsa Besir Iseni është lojtari që ka marrë masën më të lartë të ndëshkimit, duke u pezulluar për 2 vite.
Me dorë të hekurt është ndëshkuar dhe portieri Visar Bekaj, të cilit i ndalohet aktiviteti për një vit. 6 ndeshje pezullim për Albano Aleksin, Aldi Gjumsin dhe Bruno Lulajn. Ndërkohë që e pëson edhe goleadori Florent Hasani (4 ndeshje).
Me nga 8 ndeshje janë pezulluar dhe Vocaj, Jani dhe Kastrati, pjesëtarë të stafit mjekësor të klubit kryeqytetas. Vajza e presidentit Refik Halili, Goldi Halili, e cila është marrë me organizimin e brendshëm te Tirana, deklaroi se penallti provoi tifozerinë bardheblu.
“Ndeshja KF Tirana-FK Bylis, pati një përfundim të trishtueshëm për të gjithë komunitetin bardheblu. Kjo ndeshje, e cila u mbyll nga një episod tepër flagrant, siç ishte edhe ajo penallti e akorduar për miqtë në fundin e takimit, arriti të provokonte në limite tifozerinë e klubit tonë.
Një tifozeri e cila ka qenë shembull e qytetarisë në mbështetje të skuadrës së zemrës në të gjithë historinë e klubit tonë. Kjo ngjarje nuk prek vetëm tifozët e Tiranës apo dashamirësit e saj. Kjo është një shuplakë e rëndë ndaj komunitetit të futbollit në mbarë vendin. Futbolli luhet për tifozët dhe KF Tirana ka tifozerinë e saj, e cila jeton çdo ditë me skuadrën futbollit.
Ngjarja e ndeshjes së fundit na kthen shumë vite pas. Vite ku futbolli ynë kishte fusha sportive të amortizuara, arbitra të kontestuar për gjykimet e tyre dhe shumë hallka të tjera. Të cilat na privonin për ato hapa madhorë drejt futbollit profesionist ku ne kemi aspiruar gjithnjë.
Ne sot kemi stadiume moderne të rikonstruktuara, të tjera pritet të ndërtohen, ndër to edhe shtëpia bardheblu, “Selman Stërmasi”. Sapo kemi pritur një finale europiane, kemi sisteme VAR, po sjellim risi në futbollin shqiptar. Si dhe po transferojmë elementë të talentuar drejt klubeve më të afirmuar të Europës.
KF Tirana funksionon si një familje me komunitetin e saj dhe do të vijojë në çdo moment të jetë në çdo moment përfaqësuesja më e denjë e klubit të tyre të zemrës. Distancohemi nga aktet e dhunës dhe nënvizojmë se si dje dhe çdo herë tjetër, kemi zbritur në fushë vetëm për të luajtur futboll.” (A2 Televizion)
DEKLARATA E GOLDI HALILIT
A2 CNN Livestream
MUND TE LEXONI GJITHASHTU
