Carlos Tevez puthi idhullin e tij, Maradona, dhe më pas shënoi një gol dramatik që i dha skuadrës së tij, Boca Juniors, titullin kampion në Argjentinë.
Në javën e fudit të sezonit, Boca arriti të kalonte në renditje kundërshtarët historikë, River Plate dhe siguroi kampionatin pas një fitoreje 1-0 kundër Gimnasia de la Plata, që drejtohet pikërisht nga Maradona. Ndërkohë, River u ndal në barazim 1-1 nga Atletico Tucuman.
Para ndeshjes, Tevez u fotografua duke vrapuar drejt bankinës së kundërshtarëve për të puthur Diegon në buzë, i cili dikur ka luajtur gjithashtu me Boca-n. E mesa duket puthja i solli fat, pasi 36-vjeçari shënoi golin vendimtar 18 minuta para fundit të takimit. “E dija që duhet të puthja Diegon. Pata fat, por ndonjëherë fatin duhet ta kërkosh”, tha Tevez pas ndeshjes.
Ky ishte titulli i tretë për Boca Juniors në katër vite, i 34-ti në total, dy më pak se River, që nuk fiton kampionatin prej vitit 2014. Tevez, i cili ka shkëlqyer në Evropë me Manchester United dhe City, por ka luajtur edhe Juventus, u rikthye për herë të tretë të Boca, klubi i tij i parë, në janar 2018. Në këtë sezon, shënoi 9 gola në 17 ndeshje, mes tyre edhe golin vendimtar për titullin. Sigurisht, me ndihmën e idhullit të tij, Maradona... (A2 Televizion)
A2 CNN Livestream
MUND TE LEXONI GJITHASHTU
