Ndaj Turqisë, njësoj si në ndeshjen me Islandën. Trajneri Edy Reja ka pak dyshime për formacionin që do të hedhë në fushën e lojës më 11 tetor. Problemi i vetëm mbetet zëvendësimi i kapitenit Elseid Hysaj, që pas dëmtimit horror gjatë fundjavës, humbi ndeshjet e radhës me Kombëtaren.
Lojtari i Napolit, i improvizuar në një rol më të avancuar në pesëshen e mesfushës, pritet të zëvendësohet nga Odise Roshi. Një aktivizim i ngjashëm si ai me Francën, por me yllin kuqezi që këtë herë do të luajë në pozicionin e tij natyral. Roshi është një mesfushor i mirëfilltë krahu, por duke vlerësuar specifikën e skemës dhe forcën e kundërshtarit, 28-vjeçarit do t’i duhet të sakrifikojë më tepër në fazën mbrojtëse.
Përsa i takon pjesës tjetër të formacionit, Reja i qëndron besnik ekipit që fitoi 4-2 ndaj Islandës, gjatë muajit shtator. Ismajili, Dermaku dhe Gjimshiti do të rreshtohen përpara portierit Strakosha. Në mesfushë konfirmohet treshja e përbërë nga Bare, Gjasula e Memushaj, që përveç forcës fizike garantojnë dhe cilësi, me Lenjanin që do të luaj nga krahu i majtë. Sulmi mbetet i pandryshuar me Cikalleshin dhe Manajn, të cilët do të ndihmojnë shokët sa herë të jetë nevoja kanë, pa harruar edhe detyrën të finalizojnë kundërsulmet e kuqezinjve.
Turqia dhe Shqipëria përballen në Stamboll, mbrëmjen e 11 Tetorit. Turqit kryesojnë Grupin H kualifikues me 15 pikë pas 6 ndeshjeve, ndërsa kuqezinjtë pozicionohen në vendin e katërt me 9 pikë. (A2 Televizion)
A2 CNN Livestream
MUND TE LEXONI GJITHASHTU
