Gjermania, si kryesuese e Presidencës së Bashkimit Evropian, po bën presion mbi Agjencinë Europiane të Barnave për të përshpejtuar procedurën e miratimit të vaksinës anti-Covid, të kompanisë Pfizer dhe BionNtech.
Kjo u raportua nga e përditshmja "Bild", duke specifikuar se kancelarja Angela Merkel dhe ministri gjerman i Shëndetësisë synojnë të arrijnë miratimin e vaksinës më 23 dhjetor, në vend të 29 dhjetorit, siç është planifikuar aktualisht.
Evropa mbetet pas me miratimin e vaksinës kundër koronavirusit, por burime nga agjencia që merret me të, thanë se asnjë hap apo detaj nuk po anashkalohet në këtë proces që kërkon kohën e tij.
Fillimisht, u njoftua 29 dhjetori si data e përgjigjes përfundimtare, por meqë e gjithë vëmendja është përqendruar te ky konfirmim, ai mund të vijë edhe më parë.
“Po punojmë 24 orë për miratimin e vaksinës së parë anti-covid-19”, tha një përfaqësuese e agjencisë, në një konferencë për shtyp, duke shtuar se afatet do të rivlerësohen vazhdimisht. “Nuk do të ketë asnjë kompromis mbi sigurinë”, vijoi ajo. (A2 Televizion)
A2 CNN Livestream
MUND TE LEXONI GJITHASHTU
