Grupi demokrat, i përbërë nga 9 deputetë në Kuvend, ka paraqitur këtë të enjte propozimet e tyre për ndryshimet në Kodin Zgjedhor.
Ndërkohë, sot u zhvillua mbledhja e grupit të punës për hartimin dhe propozimin e amendamenteve që reflektojnë ndryshimet Kushtetuese në Kodin Zgjedhor. Tre anëtarët e këtij grupi pune, deputetët Damian Gjiknuri, Klotilda Bushka dhe Korab Lita u njohën me propozimet e mbërritura në Kuvend, konkretisht ai i Partisë Socialiste dhe disa amendamente të artikuluara nga Grupi Demokrat.
Përfaqësuesi i opozitës parlamentare, Korab Lita shprehu disa rezerva mbi propozimet e paraqitura dhe kërkoi më shumë kohë në dispozicion për të depozituar në këtë grup pune propozimet e tij në emër të opozitës parlamentare.
Grupi u dakordësua që të vazhdojë punën dhe të rimblidhet gjatë pasdites së sotme për t'u njohur me propozimet e Litës, në kërkim të arritjes së konsensusit sa më të gjerë për amendamentet e Kodit Zgjedhor.
Në orët e pasdites u zhvillua një tjetër takim i grupit të punës për hartimin dhe propozimin e amendamenteve që reflektojnë ndryshimet Kushtetuese në Kodin Zgjedhor. Në këtë mbledhje deputeti Korab Lita paraqiti propozimin e opozitës parlamentare.
Drafti i paraqitur nga Partia Socialiste ashtu sikurse propozimet e opozitës parlamentare do t'i përcillen për shqyrtim Komisionit Parlamentar për Çështjet Ligjore dhe Administratën Publike.
Komisioni Parlamentar për Çështjet Ligjore dhe Administratën Publike i ka lënë afat këtij grupi pune datën 30 shtator për të përmbyllur draftin. (A2 Televizion)
A2 CNN Livestream
MUND TE LEXONI GJITHASHTU
