24 orë pas tensioneve dhe përplasjeve në veri të Kosovës, mes policisë dhe serbëve lokalë atje, kjo fundjavë duket se riktheu qetësinë. Kryetarët e komunave të Zveçan, Zubo Potokut e Leposaviçit, sot shkuan në zyrat e tyre, pa incidente por nën masa sigurie të shtuara, pas asaj që ndodhi të premten e 26 majit.
Bllokadat e vendosura të premten, në hyrje të godinave të komunave apo edhe në rrugët kryesore, u hoqën, siç u pastruan edhe gurët e shkarkuar nga serbët atje. Në Leopsaviç, policia u kujdes po ashtu të heqë të gjitha kamerat ilegale që ishin vënë qark godinës dhe kudo nëpër rrugët e komunës.
Pas paralajmërimit dhe reagimeve me tone të ashpra ndaj kryeministri Kurti të premten, ndërkombëtarët vijuan komunikimin me të, duke dënuar edhe njëherë dhunën e ushtruar të premten në veri por edhe me kërkesën për të respektuar marrëveshjen e Ohrit dhe për të nisur menjëherë zbatimin e saj.
Në zyrën e Kurtit mbërriti të shtunën vetë emisari i Gjermanisë për Ballkanin Perëndimor, Manuel Sarrazin. Pas takimit me Kurtin dhe presidenten Osmani, Sarrazin udhëtoi drejt Mitrovicës, në zyrën e EULEX atje. Mesazhin për Kurtin e Vuçiçin e përcolli përmes mediave të Kosovës.
“Mesazhi im është që ne nuk do të lejojmë që marrëveshja e Ohrit që ofron mundësi, të hidhet poshtë për shkak të një budallallëku. çdo politikan në këtë vend dhe rajon ka përgjegjësi për veprimet e veta dhe natyrisht se ndjenja e ndonjërit prej tyre është se gjërat nuk po shkojnë si duhet, nuk mund të merren vendime të pamatura”
MANUELA SARRAZIN, EMISARI I GJERMANISË PËR BALLKANIN PERËNDIMOR
Një ditë më e qetë ka qenë edhe Beogradin zyrtar, me Presidentin Vuçiç që fillimisht mblodhi Këshillin e Sigurisë Kombëtare e më pas mori pjesë në Kongresin e jashtëzakonshëm të Partisë Progresive Serbe, nga ku, siç kishte paralajmëruar, dha dorëheqjen si kryetar i partisë.
“Ajo që do të jetë vështirësia më e madhe në periudhën e ardhshme është Kosova, pothuajse të gjithë njerëzit tanë që është dashur të marrin pjesë në këtë takim sot janë në Kosovë dhe është një situatë e vështirë....disa po sillen të paaftë, po behën naiv, por në fakt qëllimet e tyre janë, e kam fjalën për këta nga perëndimi. Synimi i tyre është që të dalim gjoja me një komunikatë kundër tyre, që me këtë gjoja na kënaqin, ndërkohë që në fakt duhet të pajtohemi me atë që quhet realiteti i ri. Me atë që quhet realitet i ri, e cila në asnjë mënyrë nuk i shkon për shati popullit serb dhe që është në kundërshtim me të gjitha marrëveshjet e nënshkruara dhe të gjitha aktet dhe normat juridike publike ndërkombëtare, ata do të vazhdojnë me këtë. Rezistenca e popullit serb sigurisht që do të jetë gjithnjë e më i fortë dhe më e fuqishme, shpresoj me mjete paqësore dhe demokratike, nëse ata sulmohen ose në ndonjë mënyrë tjetër, jam i sigurt se serbët do të mbrohen”.
PRESIDENTI I SERBISË, ALEKSANDËR VUÇIÇ
Duke kujtuar se do të vazhdojë të jetë President i Serbisë, Aleksandër Vuçiç, tha se tashmë do të nisë punë me formimin e një lëvizje të re politike. (A2 Televizion)
A2 CNN Livestream
MUND TE LEXONI GJITHASHTU
